ਫਾਜ਼ਿਲਕਾ ਤੋਂ ਇੱਕ ਚੰਗੀ ਖਬਰ ਸਾਹਮਣੇ ਆਈ ਹੈ। ਕਹਿੰਦੇ ਹਨ ਕਿ ਜਦੋਂ ਰੱਬ ਦਿੰਦਾ ਹੈ ਤਾਂ ਛੱਪਰ ਫਾੜ ਕੇ ਦਿੰਦਾ ਹੈ। ਫਾਜ਼ਿਲਕਾ ਦੇ ਇੱਕ ਸਧਾਰਣ ਮਜ਼ਦੂਰ ਨਾਲ ਵੀ ਕੁਝ ਅਜਿਹਾ ਹੀ ਹੋਇਆ ਹੈ। ਦੂਜਿਆਂ ਦੇ ਘਰਾਂ ਅਤੇ ਆਲੀਸ਼ਾਨ ਕੋਠੀਆਂ ਵਿੱਚ ਪੇਂਟ ਅਤੇ ਸਫੈਦੀ ਕਰ ਕੇ ਆਪਣੇ ਪਰਿਵਾਰ ਦੀ ਰੋਜ਼ੀ-ਰੋਟੀ ਚਲਾਉਣ ਵਾਲੇ ਇਸ ਮਿਹਨਤੀ ਵਿਅਕਤੀ ਦੀ ਕਿਸਮਤ ਇੱਕ ਰਾਤ ਵਿੱਚ ਹੀ ਬਦਲ ਗਈ। ਸਾਲਾਂ ਤੋਂ ਕਠਿਨ ਮਿਹਨਤ ਕਰਦਾ ਆ ਰਿਹਾ ਇਹ ਮਜ਼ਦੂਰ ਅਕਸਰ ਲੋਕਾਂ ਦੇ ਘਰ ਚਮਕਾਉਂਦਾ ਸੀ, ਪਰ ਕਦੇ ਸੋਚਿਆ ਵੀ ਨਹੀਂ ਸੀ ਕਿ ਇੱਕ ਦਿਨ ਉਸਦੀ ਆਪਣੀ ਕਿਸਮਤ ਵੀ ਇਸ ਤਰ੍ਹਾਂ ਚਮਕ ਉੱਠੇਗੀ।
ਕਿਸਮਤ ਦੇ ਇਸ ਅਚਾਨਕ ਚਮਤਕਾਰ ਨਾਲ ਉਸਨੇ 55,000 ਰੁਪਏ ਦਾ ਇਨਾਮ ਜਿੱਤ ਲਿਆ, ਜਿਸ ਨਾਲ ਉਸਦੇ ਘਰ ਵਿੱਚ ਖੁਸ਼ੀ ਦੀ ਲਹਿਰ ਦੌੜ ਗਈ। ਪਰਿਵਾਰ ਲਈ ਇਹ ਰਕਮ ਕਿਸੇ ਵੱਡੀ ਰਹਿਮਤ ਤੋਂ ਘੱਟ ਨਹੀਂ, ਕਿਉਂਕਿ ਰੋਜ਼ਾਨਾ ਦੀ ਮਿਹਨਤ ਨਾਲ ਜੀਵਨ ਬਸਰ ਕਰਨ ਵਾਲੇ ਇਸ ਮਜ਼ਦੂਰ ਲਈ ਇਹ ਇਨਾਮ ਇੱਕ ਨਵੀਂ ਉਮੀਦ ਅਤੇ ਹੌਸਲੇ ਦੀ ਕਿਰਨ ਬਣ ਕੇ ਆਇਆ ਹੈ।
ਪੇਂਟ ਦਾ ਕੰਮ ਕਰਨ ਵਾਲੇ ਇਸ ਮਜ਼ਦੂਰ ਨੇ ਪੰਜਾਬ ਸਟੇਟ ਲੋਹੜੀ ਬੰਪਰ ਲਾਟਰੀ ਦੀ ਇੱਕ ਟਿਕਟ ਖਰੀਦੀ ਸੀ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਲਾਟਰੀ ਸੰਚਾਲਕ ਰੂਪ ਚੰਦ ਅਤੇ ਬੌਬੀ ਬਵੇਜਾ ਨੇ ਦੱਸਿਆ ਕਿ ਉਕਤ ਮਜ਼ਦੂਰ ਨੇ ਇਹ ਲਾਟਰੀ ਟਿਕਟ ਉਨ੍ਹਾਂ ਦੀ ਦੁਕਾਨ ਤੋਂ ਹੀ ਲਈ ਸੀ। ਇਸ ਟਿਕਟ ‘ਤੇ ਉਸਦਾ 55,000 ਰੁਪਏ ਦਾ ਦੂਜਾ ਇਨਾਮ ਨਿਕਲਿਆ ਹੈ, ਜਿਸ ਨਾਲ ਉਸਦੀ ਕਿਸਮਤ ਰਾਤੋਂ-ਰਾਤ ਚਮਕ ਉੱਠੀ।
EDITED BY- HARLEEN KAUR
