ਨੀਲੇ ਡਰੰਮ ਕਤਲ ਕਾਂਡ ‘ਚ ਮੁਸਕਾਨ ਤੇ ਸਾਹਿਲ ਨੂੰ ਫਾਂਸੀ ਦੀ ਸਜ਼ਾ

ਉੱਤਰ ਪ੍ਰਦੇਸ਼ ਦੇ ਮੇਰਠ ਵਿੱਚ ਚਰਚਿਤ ਨੀਲੇ ਡਰੰਮ ਕਤਲ ਕਾਂਡ ਵਿੱਚ ਅਦਾਲਤ ਨੇ ਮੁਸਕਾਨ ਰਸਤੋਗੀ ਅਤੇ ਉਸ ਦੇ ਪ੍ਰੇਮੀ ਸਾਹਿਲ ਸ਼ੁਕਲਾ ਨੂੰ ਫਾਂਸੀ ਦੀ ਸਜ਼ਾ ਸੁਣਾਈ ਹੈ। 30 ਸਤੰਬਰ 2026 ਨੂੰ ਅਦਾਲਤ ਨੇ ਦੋਵਾਂ ਨੂੰ ਕਤਲ ਅਤੇ ਅਪਰਾਧਿਕ ਸਾਜ਼ਿਸ਼ ਦੇ ਮਾਮਲੇ ਵਿੱਚ ਦੋਸ਼ੀ ਕਰਾਰ ਦਿੱਤਾ ਸੀ। ਹੁਣ 14 ਅਕਤੂਬਰ ਨੂੰ ਅਦਾਲਤ ਵੱਲੋਂ ਸਜ਼ਾ ਦਾ ਐਲਾਨ ਕੀਤਾ ਗਿਆ। ਫੈਸਲਾ ਸੁਣਦੇ ਹੀ ਮੁਸਕਾਨ ਅਤੇ ਸਾਹਿਲ ਦੋਵੇਂ ਰੋਣ ਲੱਗ ਪਏ। ਦੂਜੇ ਪਾਸੇ ਮ੍ਰਿਤਕ ਸੌਰਭ ਰਾਜਪੂਤ ਦੇ ਪਰਿਵਾਰ ਨੇ ਅਦਾਲਤ ਦੇ ਫੈਸਲੇ ‘ਤੇ ਸੰਤੁਸ਼ਟੀ ਜਤਾਈ ਹੈ।

ਇਹ ਮਾਮਲਾ ਮਾਰਚ 2025 ਵਿੱਚ ਉਸ ਸਮੇਂ ਪੂਰੇ ਦੇਸ਼ ਵਿੱਚ ਚਰਚਾ ਦਾ ਵਿਸ਼ਾ ਬਣ ਗਿਆ ਸੀ, ਜਦੋਂ ਮੇਰਠ ਦੇ ਇੱਕ ਘਰ ਵਿੱਚੋਂ ਨੀਲੇ ਪਲਾਸਟਿਕ ਦੇ ਡਰੰਮ ਵਿੱਚ ਸੌਰਭ ਰਾਜਪੂਤ ਦੀ ਲਾਸ਼ ਮਿਲੀ ਸੀ। ਪੁਲਿਸ ਜਾਂਚ ਮੁਤਾਬਕ ਸੌਰਭ ਦੀ ਪਤਨੀ ਮੁਸਕਾਨ ਰਸਤੋਗੀ ਨੇ ਆਪਣੇ ਪ੍ਰੇਮੀ ਸਾਹਿਲ ਸ਼ੁਕਲਾ ਨਾਲ ਮਿਲ ਕੇ 3 ਮਾਰਚ 2025 ਨੂੰ ਉਸ ਦਾ ਕਤਲ ਕੀਤਾ ਸੀ। ਇਸ ਤੋਂ ਬਾਅਦ ਲਾਸ਼ ਦੇ ਟੁਕੜੇ ਕਰਕੇ ਡਰੰਮ ਵਿੱਚ ਪਾਏ ਗਏ ਅਤੇ ਸੀਮਿੰਟ ਨਾਲ ਬੰਦ ਕਰ ਦਿੱਤਾ ਗਿਆ।

ਸੌਰਭ ਰਾਜਪੂਤ ਅਤੇ ਮੁਸਕਾਨ ਰਸਤੋਗੀ ਨੇ ਸਾਲ 2016 ਵਿੱਚ ਪ੍ਰੇਮ ਵਿਆਹ ਕਰਵਾਇਆ ਸੀ। ਦੋਵਾਂ ਦੀ ਇੱਕ ਧੀ ਪੀਹੂ ਵੀ ਹੈ। ਸੌਰਭ ਮਰਚੈਂਟ ਨੇਵੀ ਵਿੱਚ ਕੰਮ ਕਰਦਾ ਸੀ ਅਤੇ ਲੰਡਨ ਰਹਿੰਦਾ ਸੀ। ਇਸ ਦੌਰਾਨ ਮੁਸਕਾਨ ਆਪਣੇ ਪੁਰਾਣੇ ਪ੍ਰੇਮੀ ਸਾਹਿਲ ਸ਼ੁਕਲਾ ਦੇ ਸੰਪਰਕ ਵਿੱਚ ਆ ਗਈ। ਪੁਲਿਸ ਜਾਂਚ ਮੁਤਾਬਕ ਦੋਵਾਂ ਨੇ ਸੌਰਭ ਨੂੰ ਰਸਤੇ ਤੋਂ ਹਟਾਉਣ ਦੀ ਸਾਜ਼ਿਸ਼ ਰਚੀ।

ਜਾਣੋ ਕਦੋਂ ਕੀ ਹੋਇਆ? 

24 ਫਰਵਰੀ 2025: ਸੌਰਭ ਰਾਜਪੂਤ ਲੰਡਨ ਤੋਂ ਮੇਰਠ ਦੇ ਇੰਦਰਾ ਨਗਰ ਸਥਿਤ ਆਪਣੇ ਘਰ ਵਾਪਸ ਆਇਆ।
25 ਫਰਵਰੀ 2025: ਪਰਿਵਾਰ ਨੇ ਘਰ ਵਿੱਚ ਮੁਸਕਾਨ ਦਾ ਜਨਮਦਿਨ ਮਨਾਇਆ।
28 ਫਰਵਰੀ 2025: ਸੌਰਭ ਅਤੇ ਮੁਸਕਾਨ ਨੇ ਆਪਣੀ ਧੀ ਪੀਹੂ ਦਾ ਜਨਮਦਿਨ ਮਨਾਇਆ।
3 ਮਾਰਚ 2025: ਪੁਲਿਸ ਜਾਂਚ ਮੁਤਾਬਕ ਮੁਸਕਾਨ ਨੇ ਸੌਰਭ ਦੇ ਖਾਣੇ ਵਿੱਚ ਨੀਂਦ ਦੀ ਦਵਾਈ ਮਿਲਾਈ। ਬੇਹੋਸ਼ ਹੋਣ ਤੋਂ ਬਾਅਦ ਸਾਹਿਲ ਨੂੰ ਘਰ ਬੁਲਾਇਆ ਗਿਆ ਅਤੇ ਦੋਵਾਂ ਨੇ ਮਿਲ ਕੇ ਸੌਰਭ ਦਾ ਕਤਲ ਕਰ ਦਿੱਤਾ।
4 ਮਾਰਚ 2025: ਸੌਰਭ ਦੀ ਲਾਸ਼ ਦੇ ਟੁਕੜੇ ਕਰਕੇ ਨੀਲੇ ਪਲਾਸਟਿਕ ਦੇ ਡਰੰਮ ਵਿੱਚ ਰੱਖੇ ਗਏ ਅਤੇ ਸੀਮਿੰਟ ਤੇ ਰੇਤ ਨਾਲ ਬੰਦ ਕਰ ਦਿੱਤਾ ਗਿਆ।

5 ਮਾਰਚ 2025: ਮੁਸਕਾਨ ਅਤੇ ਸਾਹਿਲ ਸ਼ਿਮਲਾ-ਮਨਾਲੀ ਘੁੰਮਣ ਚਲੇ ਗਏ। ਇਸ ਦੌਰਾਨ ਦੋਵੇਂ ਸੋਸ਼ਲ ਮੀਡੀਆ ‘ਤੇ ਤਸਵੀਰਾਂ ਅਤੇ ਵੀਡੀਓ ਵੀ ਪਾਉਂਦੇ ਰਹੇ।
17 ਮਾਰਚ 2025: ਦੋਵੇਂ ਹਿਮਾਚਲ ਪ੍ਰਦੇਸ਼ ਤੋਂ ਵਾਪਸ ਆਏ। ਇਸ ਤੋਂ ਬਾਅਦ ਮੁਸਕਾਨ ਨੇ ਆਪਣੇ ਪਰਿਵਾਰ ਨੂੰ ਘਟਨਾ ਬਾਰੇ ਦੱਸਿਆ।
18 ਮਾਰਚ 2025: ਸੌਰਭ ਦੇ ਭਰਾ ਰਾਹੁਲ ਨੇ ਪੁਲਿਸ ਕੋਲ ਸ਼ਿਕਾਇਤ ਦਰਜ ਕਰਵਾਈ। ਪੁਲਿਸ ਨੇ ਘਰ ਦੀ ਤਲਾਸ਼ੀ ਦੌਰਾਨ ਨੀਲੇ ਡਰੰਮ ਵਿੱਚੋਂ ਲਾਸ਼ ਬਰਾਮਦ ਕੀਤੀ।

19 ਮਾਰਚ 2025: ਪੁਲਿਸ ਨੇ ਮੁਸਕਾਨ ਰਸਤੋਗੀ ਅਤੇ ਸਾਹਿਲ ਸ਼ੁਕਲਾ ਨੂੰ ਗ੍ਰਿਫ਼ਤਾਰ ਕਰਕੇ ਮੇਰਠ ਜ਼ਿਲ੍ਹਾ ਜੇਲ੍ਹ ਭੇਜ ਦਿੱਤਾ।
12 ਮਈ 2025: ਪੁਲਿਸ ਨੇ ਅਦਾਲਤ ਵਿੱਚ ਕਰੀਬ 1,000 ਪੰਨਿਆਂ ਦੀ ਚਾਰਜਸ਼ੀਟ ਦਾਖਲ ਕੀਤੀ।
ਜੁਲਾਈ 2025: ਜ਼ਿਲ੍ਹਾ ਅਤੇ ਸੈਸ਼ਨ ਜੱਜ ਅਰਵਿੰਦ ਕੁਮਾਰ ਮਿਸ਼ਰਾ ਦੀ ਅਦਾਲਤ ਵਿੱਚ ਮਾਮਲੇ ਦੀ ਸੁਣਵਾਈ ਸ਼ੁਰੂ ਹੋਈ।
ਨਵੰਬਰ 2025: ਮੁਸਕਾਨ ਨੇ ਜੇਲ੍ਹ ਵਿੱਚ ਆਪਣੀ ਦੂਜੀ ਧੀ ਨੂੰ ਜਨਮ ਦਿੱਤਾ।

21 ਅਪ੍ਰੈਲ 2026: ਅਦਾਲਤ ਵਿੱਚ ਦੋਵਾਂ ਮੁਲਜ਼ਮਾਂ ਤੋਂ ਸਵਾਲ-ਜਵਾਬ ਕੀਤੇ ਗਏ। ਦੋਵਾਂ ਨੇ ਆਪਣੇ ਉੱਪਰ ਲੱਗੇ ਦੋਸ਼ਾਂ ਤੋਂ ਇਨਕਾਰ ਕੀਤਾ।
17 ਸਤੰਬਰ 2026: ਮਾਮਲੇ ਵਿੱਚ ਆਖਰੀ ਬਹਿਸ ਪੂਰੀ ਹੋਈ ਅਤੇ ਸਰਕਾਰੀ ਵਕੀਲ ਨੇ ਦੋਵਾਂ ਲਈ ਫਾਂਸੀ ਦੀ ਸਜ਼ਾ ਦੀ ਮੰਗ ਕੀਤੀ।
30 ਸਤੰਬਰ 2026: ਅਦਾਲਤ ਨੇ ਮੁਸਕਾਨ ਅਤੇ ਸਾਹਿਲ ਨੂੰ ਕਤਲ, ਸਬੂਤ ਲੁਕਾਉਣ ਅਤੇ ਅਪਰਾਧਿਕ ਸਾਜ਼ਿਸ਼ ਰਚਣ ਦਾ ਦੋਸ਼ੀ ਕਰਾਰ ਦਿੱਤਾ।
14 ਅਕਤੂਬਰ 2026: ਅਦਾਲਤ ਨੇ ਦੋਵਾਂ ਨੂੰ ਮੌਤ ਦੀ ਸਜ਼ਾ ਸੁਣਾਈ। ਫੈਸਲਾ ਸੁਣਦੇ ਹੀ ਦੋਵੇਂ ਭਾਵੁਕ ਹੋ ਗਏ ਅਤੇ ਰੋਣ ਲੱਗ ਪਏ।

126 ਪੇਸ਼ੀਆਂ ਅਤੇ 22 ਤੋਂ ਵੱਧ ਗਵਾਹ

ਮਾਮਲੇ ਦੀ ਸੁਣਵਾਈ ਦੌਰਾਨ ਕੁੱਲ 126 ਪੇਸ਼ੀਆਂ ਹੋਈਆਂ ਅਤੇ 22 ਤੋਂ ਵੱਧ ਗਵਾਹਾਂ ਦੇ ਬਿਆਨ ਦਰਜ ਕੀਤੇ ਗਏ। ਪੁਲਿਸ ਨੇ ਫੋਰੈਂਸਿਕ ਸਬੂਤਾਂ, ਮੋਬਾਈਲ ਲੋਕੇਸ਼ਨ ਅਤੇ ਗਵਾਹਾਂ ਦੇ ਬਿਆਨਾਂ ਦੇ ਆਧਾਰ ‘ਤੇ ਅਦਾਲਤ ਵਿੱਚ ਆਪਣਾ ਪੱਖ ਰੱਖਿਆ। ਅਦਾਲਤ ਨੇ ਇਸ ਕਤਲ ਦੀ ਗੰਭੀਰਤਾ ਨੂੰ ਦੇਖਦਿਆਂ ਦੋਵਾਂ ਨੂੰ ਫਾਂਸੀ ਦੀ ਸਜ਼ਾ ਸੁਣਾਈ। ਹਾਲਾਂਕਿ ਮੌਤ ਦੀ ਸਜ਼ਾ ਲਾਗੂ ਹੋਣ ਤੋਂ ਪਹਿਲਾਂ ਹਾਈ ਕੋਰਟ ਦੀ ਪੁਸ਼ਟੀ ਲਾਜ਼ਮੀ ਹੁੰਦੀ ਹੈ।