ਮਹਿਲਾਵਾਂ ‘ਚ ਵਾਰ-ਵਾਰ ਕਿਉਂ ਹੁੰਦਾ ਹੈ UTI

ਮਹਿਲਾਵਾਂ ਵਿੱਚ ਪੁਰਸ਼ਾਂ ਦੇ ਮੁਕਾਬਲੇ UTI ਯਾਨੀ ਯੂਰੀਨਰੀ ਟ੍ਰੈਕਟ ਇਨਫੈਕਸ਼ਨ ਕਾਫੀ ਜ਼ਿਆਦਾ ਹੁੰਦਾ ਹੈ। ਇਸ ਦਾ ਸਭ ਤੋਂ ਵੱਡਾ ਕਾਰਨ ਉਨ੍ਹਾਂ ਦੀ ਸਰੀਰਕ ਬਣਤਰ ਹੈ। ਮਹਿਲਾਵਾਂ ਦੀ ਪਿਸ਼ਾਬ ਵਾਲੀ ਨਲੀ ਪੁਰਸ਼ਾਂ ਦੇ ਮੁਕਾਬਲੇ ਛੋਟੀ ਹੁੰਦੀ ਹੈ, ਜਿਸ ਕਾਰਨ ਬੈਕਟੀਰੀਆ ਲਈ ਬਲੈਡਰ ਤੱਕ ਪਹੁੰਚਣਾ ਆਸਾਨ ਹੋ ਜਾਂਦਾ ਹੈ। ਇਸ ਤੋਂ ਇਲਾਵਾ ਹਾਰਮੋਨ ਵਿੱਚ ਬਦਲਾਅ ਵੀ UTI ਹੋਣ ਦਾ ਇੱਕ ਵੱਡਾ ਕਾਰਨ ਹੈ। ਖਾਸ ਕਰਕੇ ਮੀਨੋਪੌਜ਼ ਦੌਰਾਨ ਐਸਟ੍ਰੋਜਨ ਦਾ ਪੱਧਰ ਘੱਟ ਹੋਣ ਨਾਲ ਪਿਸ਼ਾਬ ਵਾਲੇ ਰਸਤੇ ਦੀ ਕੁਦਰਤੀ ਸੁਰੱਖਿਆ ਕਮਜ਼ੋਰ ਹੋ ਸਕਦੀ ਹੈ।

ਗਰਭ ਅਵਸਥਾ ਦੌਰਾਨ ਵਧਦਾ ਹੋਇਆ ਬੱਚੇਦਾਨੀ ਦਾ ਆਕਾਰ ਬਲੈਡਰ ‘ਤੇ ਦਬਾਅ ਪਾ ਸਕਦਾ ਹੈ, ਜਿਸ ਕਾਰਨ ਪਿਸ਼ਾਬ ਪੂਰੀ ਤਰ੍ਹਾਂ ਬਾਹਰ ਨਾ ਨਿਕਲਣ ਦੀ ਸਮੱਸਿਆ ਹੋ ਸਕਦੀ ਹੈ ਅਤੇ ਬੈਕਟੀਰੀਆ ਪੈਦਾ ਹੋਣ ਦਾ ਖਤਰਾ ਵਧ ਜਾਂਦਾ ਹੈ। ਕੁਝ ਗਰਭਨਿਰੋਧਕ ਤਰੀਕਿਆਂ, ਜਿਵੇਂ ਡਾਇਆਫ੍ਰਾਮ ਅਤੇ ਸਪਰਮਿਸਾਈਡ, ਦੀ ਵਰਤੋਂ ਨਾਲ ਵੀ ਕੁਝ ਮਹਿਲਾਵਾਂ ਵਿੱਚ UTI ਦਾ ਖਤਰਾ ਵਧ ਸਕਦਾ ਹੈ। ਕਈ ਵਾਰ ਸਰੀਰਕ ਸੰਬੰਧ ਬਣਾਉਣ ਤੋਂ ਬਾਅਦ ਵੀ ਇਹ ਇਨਫੈਕਸ਼ਨ ਹੋ ਸਕਦਾ ਹੈ।

UTI ਦੇ ਕੀ ਹਨ ਲੱਛਣ?

ਮਹਿਲਾਵਾਂ ਵਿੱਚ UTI ਹੋਣ ‘ਤੇ ਪਿਸ਼ਾਬ ਕਰਦੇ ਸਮੇਂ ਤੇਜ਼ ਜਲਣ ਜਾਂ ਦਰਦ ਹੋ ਸਕਦਾ ਹੈ। ਇਸ ਦੇ ਨਾਲ ਵਾਰ-ਵਾਰ ਪਿਸ਼ਾਬ ਆਉਣਾ ਵੀ ਆਮ ਲੱਛਣ ਹੈ। ਪਿਸ਼ਾਬ ਵਾਰ-ਵਾਰ ਅਤੇ ਘੱਟ ਮਾਤਰਾ ਵਿੱਚ ਆ ਸਕਦਾ ਹੈ ਅਤੇ ਪਿਸ਼ਾਬ ਰੋਕਣ ਵਿੱਚ ਵੀ ਮੁਸ਼ਕਲ ਹੋ ਸਕਦੀ ਹੈ।

ਇਸ ਤੋਂ ਇਲਾਵਾ ਪੇਟ ਦੇ ਹੇਠਲੇ ਹਿੱਸੇ, ਯਾਨੀ ਪੈਲਵਿਕ ਖੇਤਰ ਵਿੱਚ ਦਰਦ ਜਾਂ ਭਾਰੀਪਨ ਮਹਿਸੂਸ ਹੋ ਸਕਦਾ ਹੈ। UTI ਦੌਰਾਨ ਪਿਸ਼ਾਬ ਦਾ ਰੰਗ ਧੁੰਦਲਾ ਹੋ ਸਕਦਾ ਹੈ ਅਤੇ ਉਸ ਵਿੱਚ ਤੇਜ਼ ਜਾਂ ਅਜੀਬ ਬਦਬੂ ਆ ਸਕਦੀ ਹੈ। ਕੁਝ ਮਾਮਲਿਆਂ ਵਿੱਚ ਇਨਫੈਕਸ਼ਨ ਵਧਣ ‘ਤੇ ਪਿਸ਼ਾਬ ਵਿੱਚ ਖੂਨ ਆ ਸਕਦਾ ਹੈ, ਜਿਸ ਕਾਰਨ ਇਸ ਦਾ ਰੰਗ ਹਲਕਾ ਗੁਲਾਬੀ ਵੀ ਦਿਖਾਈ ਦੇ ਸਕਦਾ ਹੈ।

ਇਹ ਇਨਫੈਕਸ਼ਨ ਸਰੀਰ ਵਿੱਚ ਕਮਜ਼ੋਰੀ ਅਤੇ ਥਕਾਵਟ ਵੀ ਪੈਦਾ ਕਰ ਸਕਦਾ ਹੈ। ਜੇਕਰ ਇਨਫੈਕਸ਼ਨ ਜ਼ਿਆਦਾ ਵਧ ਜਾਵੇ ਅਤੇ ਬਲੈਡਰ ਤੋਂ ਕਿਡਨੀ ਤੱਕ ਪਹੁੰਚ ਜਾਵੇ ਤਾਂ ਤੇਜ਼ ਬੁਖਾਰ, ਕੰਬਣੀ, ਪਿੱਠ ਦੇ ਉੱਪਰਲੇ ਹਿੱਸੇ ਵਿੱਚ ਤੇਜ਼ ਦਰਦ, ਉਲਟੀਆਂ ਜਾਂ ਲਗਾਤਾਰ ਜੀਅ ਮਤਲਾਉਣ ਵਰਗੇ ਗੰਭੀਰ ਲੱਛਣ ਹੋ ਸਕਦੇ ਹਨ।

ਕਿਵੇਂ ਰੱਖੀਏ ਆਪਣਾ ਖਿਆਲ?

UTI ਤੋਂ ਬਚਣ ਅਤੇ ਵਾਰ-ਵਾਰ ਹੋਣ ਵਾਲੇ ਇਨਫੈਕਸ਼ਨ ਨੂੰ ਰੋਕਣ ਲਈ ਰੋਜ਼ਾਨਾ ਦੀਆਂ ਕੁਝ ਆਦਤਾਂ ਵਿੱਚ ਛੋਟੇ ਬਦਲਾਅ ਮਦਦਗਾਰ ਹੋ ਸਕਦੇ ਹਨ। ਦਿਨ ਭਰ ਲੋੜ ਮੁਤਾਬਕ ਕਾਫੀ ਪਾਣੀ ਪੀਓ। ਇਸ ਨਾਲ ਪਿਸ਼ਾਬ ਰਾਹੀਂ ਬੈਕਟੀਰੀਆ ਬਾਹਰ ਨਿਕਲਣ ਵਿੱਚ ਮਦਦ ਮਿਲਦੀ ਹੈ। ਪ੍ਰਾਈਵੇਟ ਪਾਰਟ ‘ਤੇ ਖੁਸ਼ਬੂਦਾਰ ਸਾਬਣ, ਸਪਰੇਅ ਜਾਂ ਡਿਓਡਰੈਂਟ ਦੀ ਵਰਤੋਂ ਨਾ ਕਰੋ। ਪਿਸ਼ਾਬ ਨੂੰ ਜ਼ਿਆਦਾ ਦੇਰ ਤੱਕ ਨਾ ਰੋਕੋ।ਸਰੀਰਕ ਸੰਬੰਧ ਬਣਾਉਣ ਤੋਂ ਬਾਅਦ ਪਿਸ਼ਾਬ ਜ਼ਰੂਰ ਕਰੋ। ਸੂਤੀ ਅੰਡਰਵੀਅਰ ਪਹਿਨੋ ਅਤੇ ਬਹੁਤ ਜ਼ਿਆਦਾ ਟਾਈਟ ਕੱਪੜਿਆਂ ਤੋਂ ਬਚੋ।ਆਰਾਮਦਾਇਕ ਅਤੇ ਹਵਾਦਾਰ ਕੱਪੜੇ ਪਹਿਨੋ। ਆਪਣੀ ਡਾਈਟ ਵਿੱਚ ਦਹੀਂ ਅਤੇ ਪ੍ਰੋਬਾਇਓਟਿਕ ਖੁਰਾਕ ਸ਼ਾਮਲ ਕਰ ਸਕਦੇ ਹੋ। ਜੇਕਰ ਡਾਕਟਰ ਨੇ ਐਂਟੀਬਾਇਓਟਿਕ ਦਵਾਈ ਦਿੱਤੀ ਹੈ ਤਾਂ ਉਸ ਦਾ ਪੂਰਾ ਕੋਰਸ ਕਰੋ ਅਤੇ ਆਪਣੀ ਮਰਜ਼ੀ ਨਾਲ ਦਵਾਈ ਬੰਦ ਨਾ ਕਰੋ।

EDITED BY- HARLEEN KAUR