ਲੁਧਿਆਣਾ ਵਿੱਚ 27 ਸਾਲ ਦੀ ਵਿਆਹਤਾ ਔਰਤ ਦੀ ਸ਼ੱਕੀ ਹਾਲਾਤਾਂ ਵਿੱਚ ਮੌਤ ਹੋ ਗਈ। ਔਰਤ ਦੀ ਲਾਸ਼ ਫੰਦਿਆਂ ‘ਤੇ ਲਟਕੀ ਮਿਲੀ। ਔਰਤ ਨੇ 11 ਮਹੀਨੇ ਪਹਿਲਾਂ ਹੀ ਲਵ ਮੈਰਿਜ ਕੀਤਾ ਸੀ। ਦੇਰ ਰਾਤ ਔਰਤ ਦੇ ਪੇਕੇ ਪਰਿਵਾਰ ਵਾਲੇ ਥਾਣਾ ਜਮਾਲਪੁਰ ਪੁਲਿਸ ਕੋਲ ਪਹੁੰਚੇ।
ਉਹਨਾਂ ਪਤੀ ‘ਤੇ ਔਰਤ ਦਾ ਗਲਾ ਘੋਟ ਕੇ ਕਤਲ ਕਰਨ ਦਾ ਦੋਸ਼ ਲਾਇਆ। ਮ੍ਰਿਤਕ ਔਰਤ ਦੀ ਪਛਾਣ ਭਾਵਨਾ (27) ਵਜੋਂ ਹੋਈ, ਜੋ ਰਾਹੁਲ ਗੋਦਾਰਾ ਦੀ ਪਤਨੀ ਸੀ ਅਤੇ ਨਿਊ ਗੁਰੂ ਨਾਨਕ ਨਗਰ, ਜਮਾਲਪੁਰ ਵਿੱਚ ਰਹਿੰਦੀ ਸੀ। ਔਰਤ ਦਾ ਅੱਜ ਸਿਵਲ ਹਸਪਤਾਲ ਵਿੱਚ ਪੋਸਟਮਾਰਟਮ ਕਰਵਾਇਆ ਜਾਵੇਗਾ।
ਔਰਤ ਦੀ ਮਾਂ ਪੁਸ਼ਪ ਲਤਾ ਨੇ ਦੋਸ਼ ਲਾਇਆ ਕਿ ਉਹਨਾਂ ਦੀ ਧੀ ਦਾ ਵਿਆਹ ਰਾਹੁਲ ਨਾਲ ਮਾਰਚ 2025 ਵਿੱਚ ਹੋਇਆ ਸੀ। ਇਸ ਤੋਂ ਬਾਅਦ ਦੋਵੇਂ ਵਿਚ ਅਕਸਰ ਲੜਾਈ-ਝਗੜਾ ਹੁੰਦਾ ਰਹਿੰਦਾ ਸੀ। ਅਕਸਰ ਉਸਨੂੰ ਦਹੇਜ਼ ਲਿਆਉਣ ਲਈ ਮਾਨਸਿਕ ਤੌਰ ‘ਤੇ ਤਕਲੀਫ਼ ਦਿੱਤੀ ਜਾਂਦੀ ਸੀ।
ਸੋਮਵਾਰ ਨੂੰ ਉਹਨਾਂ ਦੀ ਧੀ ਦੇ ਸਹੁਰੇ ਰਾਧੇਸ਼ਯਾਮ ਨੇ ਫੋਨ ਕਰਕੇ ਦੱਸਿਆ ਕਿ ਭਾਵਨਾ ਨੂੰ ਹਾਰਟ ਅਟੈਕ ਆਇਆ। ਉਸ ਸਮੇਂ ਉਹ ਖੁਦ ਹਰਿਆਣਾ ਵਿੱਚ ਸਨ। ਫਿਰ ਪੁਸ਼ਪ ਲਤਾ ਲੁਧਿਆਣਾ ਆਪਣੀ ਧੀ ਕੋਲ ਪਹੁੰਚੀ। ਪਰ ਲੁਧਿਆਣਾ ਆ ਕੇ ਉਹਨਾਂ ਨੂੰ ਪਤਾ ਲੱਗਾ ਕਿ ਉਹਨਾਂ ਦੀ ਧੀ ਦੀ ਮੌਤ ਫੰਦੇ ਦੇ ਨਾਲ ਲਟਕਣ ਕਾਰਨ ਹੋਈ ਹੈ।
ਇਸ ਤੋਂ ਬਾਅਦ ਪੁਸ਼ਪ ਲਤਾ ਨੇ ਭਾਵਨਾ ਦੇ ਪਤੀ ਰਾਹੁਲ ਉਤੇ ਕਤਲ ਦਾ ਦੋਸ਼ ਲਗਾਇਆ ਅਤੇ ਮਾਮਲੇ ਦੀ ਸ਼ਿਕਾਇਤ ਥਾਣਾ ਜਮਾਲਪੁਰ ਪੁਲਿਸ ਕੋਲ ਕੀਤੀ। ਫਿਰ ਦੇਰ ਰਾਤ ਸਵਾ 10 ਵਜੇ ਤੱਕ ਥਾਣਾ ਜਮਾਲਪੁਰ ਵਿੱਚ ਜਾ ਕੇ ਦੋਸ਼ੀਆਂ ਖਿਲਾਫ ਕੇਸ ਦਰਜ ਕਰਵਾਇਆ ਗਿਆ। ਪੁਲਿਸ ਨੇ ਪਤੀ ਰਾਹੁਲ ਗੋਦਾਰਾ, ਦੇਵਰ ਰਿੰਕੂ ਗੋਦਾਰਾ ਅਤੇ ਦੇਵਰ ਰੋਹਿਤ ਗੋਦਾਰਾ ਖਿਲਾਫ BNS ਦੀ ਧਾਰਾ 80, 61 (2) ਅਧੀਨ ਮਾਮਲਾ ਦਰਜ ਕੀਤਾ ਹੈ।
ਜਾਂਚ ਅਧਿਕਾਰੀ ਰੋਹਿਤ ਨੇ ਦੱਸਿਆ ਕਿ ਫਿਲਹਾਲ ਔਰਤ ਦੀ ਲਾਸ਼ ਪੋਸਟਮਾਰਟਮ ਲਈ ਸਿਵਲ ਹਸਪਤਾਲ ਦੀ ਮੌਰਚਰੀ ਵਿੱਚ ਰੱਖਵਾਈ ਗਈ ਹੈ। ਰਿਪੋਰਟ ਆਉਣ ਤੋਂ ਬਾਅਦ ਹੀ ਮੌਤ ਦਾ ਅਸਲ ਕਾਰਨ ਖੁਲਾਸਾ ਹੋਵੇਗਾ।
EDITED BY- HARLEEN KAUR
