ਛੱਤੀਸਗੜ੍ਹ ਦੀ ਰਾਜਧਾਨੀ ਰਾਏਪੁਰ ਤੋਂ ਅੰਧਵਿਸ਼ਵਾਸ ਦੇ ਨਾਂ ‘ਤੇ ਕਰੋੜਾਂ ਦੀ ਨਹੀਂ, ਸਗੋਂ ਲੱਖਾਂ ਦੀ ਠੱਗੀ ਦਾ ਇੱਕ ਹੈਰਾਨ ਕਰਨ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ। ਆਪਣੇ ਆਪ ਨੂੰ ‘ਚਾਵਲ ਵਾਲਾ ਬਾਬਾ’ ਦੱਸਣ ਵਾਲੇ ਇੱਕ ਕਥਿਤ ਤਾਂਤਰਿਕ ‘ਤੇ ਨੋਇਡਾ ਦੇ ਡਾਕਟਰ ਤੋਂ ਕਰੀਬ 40 ਲੱਖ ਰੁਪਏ ਠੱਗਣ ਦੇ ਦੋਸ਼ ਲੱਗੇ ਹਨ। ਸ਼ਿਕਾਇਤ ਮਿਲਣ ਤੋਂ ਬਾਅਦ ਰਾਏਪੁਰ ਦੇ ਖਮ੍ਹਾਰਡੀਹ ਥਾਣਾ ਪੁਲਿਸ ਨੇ ਮਾਮਲਾ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
ਸ਼ਿਕਾਇਤ ਅਨੁਸਾਰ ਨੋਇਡਾ ਦੇ ਡਾਕਟਰ ਰਿਸ਼ਭ ਚੌਬੇ ਦੇ ਛੋਟੇ ਭਰਾ ਦਿਵਿਆ ਦੇਵ ਚੌਬੇ ਦੀ 11 ਅਗਸਤ 2024 ਨੂੰ ਇੰਦੌਰ ਵਿੱਚ ਸ਼ੱਕੀ ਹਾਲਾਤਾਂ ਵਿੱਚ ਮੌਤ ਹੋ ਗਈ ਸੀ। ਭਰਾ ਦੀ ਮੌਤ ਦੇ ਸਦਮੇ ਵਿੱਚ ਡਾਕਟਰ ਕਥਿਤ ਤਾਂਤਰਿਕ ਨਰਿੰਦਰ ਨਯਨ ਸ਼ਾਸਤਰੀ ਦੇ ਸੰਪਰਕ ਵਿੱਚ ਆਇਆ। ਦੋਸ਼ ਹੈ ਕਿ ਬਾਬੇ ਨੇ ਦਾਅਵਾ ਕੀਤਾ ਕਿ ਪਰਿਵਾਰ ‘ਤੇ ਪ੍ਰੇਤ ਆਤਮਾ ਦਾ ਸਾਇਆ ਹੈ ਅਤੇ ਜੇਕਰ ਵਿਸ਼ੇਸ਼ ਪੂਜਾ-ਪਾਠ ਅਤੇ ਤੰਤਰ-ਮੰਤਰ ਨਾ ਕਰਵਾਏ ਗਏ ਤਾਂ ਡਾਕਟਰ ਦੇ ਪੁੱਤਰਾਂ ਦੀ ਜਾਨ ਵੀ ਖ਼ਤਰੇ ਵਿੱਚ ਪੈ ਸਕਦੀ ਹੈ।
ਪਰਿਵਾਰ ਦੀ ਸੁਰੱਖਿਆ ਨੂੰ ਲੈ ਕੇ ਚਿੰਤਤ ਡਾਕਟਰ ਨੇ ਬਾਬੇ ਦੀਆਂ ਗੱਲਾਂ ‘ਤੇ ਵਿਸ਼ਵਾਸ ਕਰ ਲਿਆ। ਦੋਸ਼ ਹੈ ਕਿ ਅਕਤੂਬਰ 2024 ਤੋਂ ਫਰਵਰੀ 2026 ਤੱਕ ਵੱਖ-ਵੱਖ ਧਾਰਮਿਕ ਰਸਮਾਂ, ਅਨੁਸ਼ਠਾਨਾਂ ਅਤੇ ਤਾਂਤਰਿਕ ਕਿਰਿਆਵਾਂ ਦੇ ਨਾਂ ‘ਤੇ ਉਸ ਤੋਂ ਲਗਾਤਾਰ ਪੈਸੇ ਵਸੂਲੇ ਗਏ।
ਡਾਕਟਰ ਦਾ ਦਾਅਵਾ ਹੈ ਕਿ ਮਈ 2025 ਵਿੱਚ ਬਾਬੇ ਨੇ ਆਪਣੇ ਲਈ ਮਹਿੰਗੀ ਕਾਰ ਖਰੀਦਣ ਦੇ ਨਾਂ ‘ਤੇ 20 ਲੱਖ ਰੁਪਏ ਸਿੱਧੇ ਆਪਣੇ ਬੈਂਕ ਖਾਤੇ ਵਿੱਚ ਟਰਾਂਸਫਰ ਕਰਵਾਏ। ਇਸ ਤੋਂ ਇਲਾਵਾ ਪੂਜਾ-ਪਾਠ ਅਤੇ ਤਾਂਤਰਿਕ ਰਸਮਾਂ ਲਈ ਕਰੀਬ 10 ਲੱਖ ਰੁਪਏ ਨਕਦ ਲਏ ਗਏ। ਬਾਬੇ ਦੇ ਦੌਰੇ, ਵੀਆਈਪੀ ਇੰਤਜ਼ਾਮਾਂ ਅਤੇ ਹਵਾਈ ਯਾਤਰਾਵਾਂ ਦਾ ਖਰਚਾ ਵੀ ਡਾਕਟਰ ਤੋਂ ਹੀ ਕਰਵਾਇਆ ਗਿਆ, ਜਿਸ ‘ਤੇ ਹੋਰ ਕਰੀਬ 10 ਲੱਖ ਰੁਪਏ ਖਰਚ ਹੋਏ। ਇਸ ਤਰ੍ਹਾਂ ਕੁੱਲ ਕਰੀਬ 40 ਲੱਖ ਰੁਪਏ ਦੀ ਠੱਗੀ ਹੋਣ ਦਾ ਦਾਅਵਾ ਕੀਤਾ ਗਿਆ ਹੈ।
ਜਦੋਂ ਡਾਕਟਰ ਨੂੰ ਅਹਿਸਾਸ ਹੋਇਆ ਕਿ ਉਹ ਧੋਖਾਧੜੀ ਦਾ ਸ਼ਿਕਾਰ ਹੋ ਗਿਆ ਹੈ ਤਾਂ ਉਸ ਨੇ ਰਾਏਪੁਰ ਪੁਲਿਸ ਕੋਲ ਲਿਖਤੀ ਸ਼ਿਕਾਇਤ ਦਰਜ ਕਰਵਾਈ।
ਰਾਏਪੁਰ ਪੁਲਿਸ ਮੁਤਾਬਕ ਕਥਿਤ ‘ਚਾਵਲ ਵਾਲਾ ਬਾਬਾ’ ਨਰਿੰਦਰ ਨਯਨ ਸ਼ਾਸਤਰੀ ਪਹਿਲਾਂ ਵੀ ਇੱਕ ਹੋਰ ਗੰਭੀਰ ਮਾਮਲੇ ਵਿੱਚ ਦੋਸ਼ੀ ਹੈ ਅਤੇ ਇਸ ਵੇਲੇ ਮਹਾਸਮੁੰਦ ਜੇਲ੍ਹ ਵਿੱਚ ਬੰਦ ਹੈ। ਪੁਲਿਸ ਅਦਾਲਤ ਤੋਂ ਇਜਾਜ਼ਤ ਲੈ ਕੇ ਉਸ ਨੂੰ ਰਿਮਾਂਡ ‘ਤੇ ਲਿਆਉਣ ਦੀ ਤਿਆਰੀ ਕਰ ਰਹੀ ਹੈ, ਤਾਂ ਜੋ ਠੱਗੀ ਨਾਲ ਹਾਸਲ ਕੀਤੀ ਰਕਮ ਦੀ ਬਰਾਮਦਗੀ ਅਤੇ ਮਾਮਲੇ ਦੇ ਹੋਰ ਪਹਿਲੂਆਂ ਦੀ ਜਾਂਚ ਕੀਤੀ ਜਾ ਸਕੇ। ਪੁਲਿਸ ਇਹ ਵੀ ਪਤਾ ਲਗਾ ਰਹੀ ਹੈ ਕਿ ਕੀ ਇਸ ਕਥਿਤ ਬਾਬੇ ਨੇ ਹੋਰ ਲੋਕਾਂ ਨੂੰ ਵੀ ਇਸੇ ਤਰੀਕੇ ਨਾਲ ਆਪਣਾ ਸ਼ਿਕਾਰ ਬਣਾਇਆ ਹੈ।
