ਮਾਨਸੂਨ ਦੀ ਬਾਰਿਸ਼ ਗਰਮੀ ਤੋਂ ਰਾਹਤ ਤਾਂ ਦਿੰਦੀ ਹੈ, ਪਰ ਇਸ ਮੌਸਮ ਵਿੱਚ ਥੋੜ੍ਹੀ ਜਿਹੀ ਲਾਪਰਵਾਹੀ ਤੁਹਾਡੀ ਸਿਹਤ ਅਤੇ ਸੁਰੱਖਿਆ ਲਈ ਭਾਰੀ ਪੈ ਸਕਦੀ ਹੈ। ਘਰ ਤੋਂ ਬਾਹਰ ਨਿਕਲਣ ਤੋਂ ਪਹਿਲਾਂ ਕੁਝ ਜ਼ਰੂਰੀ ਗੱਲਾਂ ਦਾ ਧਿਆਨ ਰੱਖ ਕੇ ਤੁਸੀਂ ਕਈ ਤਰ੍ਹਾਂ ਦੀਆਂ ਪਰੇਸ਼ਾਨੀਆਂ ਤੋਂ ਬਚ ਸਕਦੇ ਹੋ। ਆਓ ਜਾਣਦੇ ਹਾਂ ਕਿ ਬਾਰਿਸ਼ ਦੌਰਾਨ ਬਾਹਰ ਜਾਣ ਤੋਂ ਪਹਿਲਾਂ ਕਿਹੜੀਆਂ ਗੱਲਾਂ ਦਾ ਖਾਸ ਧਿਆਨ ਰੱਖਣਾ ਚਾਹੀਦਾ ਹੈ।
ਮੌਸਮ ਦਾ ਪਹਿਲਾਂ ਹਾਲ ਜਾਣੋ- ਸਭ ਤੋਂ ਪਹਿਲਾਂ ਮੌਸਮ ਦੀ ਜਾਣਕਾਰੀ ਜ਼ਰੂਰ ਲੈ ਲਵੋ। ਕਈ ਵਾਰ ਅਚਾਨਕ ਤੇਜ਼ ਮੀਂਹ, ਹਨੇਰੀ ਜਾਂ ਪਾਣੀ ਭਰਨ ਵਰਗੀ ਸਥਿਤੀ ਬਣ ਜਾਂਦੀ ਹੈ। ਮੌਸਮ ਦੀ ਜਾਣਕਾਰੀ ਹੋਣ ਨਾਲ ਤੁਸੀਂ ਆਪਣੀ ਯਾਤਰਾ ਦੀ ਬਿਹਤਰ ਯੋਜਨਾ ਬਣਾ ਸਕਦੇ ਹੋ ਅਤੇ ਬੇਲੋੜੇ ਖਤਰੇ ਤੋਂ ਬਚ ਸਕਦੇ ਹੋ।
ਜ਼ਰੂਰੀ ਸਮਾਨ ਨਾਲ ਰੱਖੋ- ਬਾਰਿਸ਼ ਵਿੱਚ ਬਾਹਰ ਨਿਕਲਦੇ ਸਮੇਂ ਛਤਰੀ, ਰੇਨਕੋਟ ਜਾਂ ਵਾਟਰਪ੍ਰੂਫ ਜੈਕੇਟ ਨਾਲ ਰੱਖਣਾ ਨਾ ਭੁੱਲੋ। ਮੌਸਮ ਕਦੇ ਵੀ ਬਦਲ ਸਕਦਾ ਹੈ ਅਤੇ ਅਚਾਨਕ ਹੋਣ ਵਾਲੀ ਬਾਰਿਸ਼ ਤੁਹਾਨੂੰ ਪੂਰੀ ਤਰ੍ਹਾਂ ਭਿੱਜਾ ਸਕਦੀ ਹੈ। ਭਿੱਜਣ ਨਾਲ ਜ਼ੁਕਾਮ, ਬੁਖਾਰ ਅਤੇ ਹੋਰ ਇਨਫੈਕਸ਼ਨ ਦਾ ਖਤਰਾ ਵੱਧ ਸਕਦਾ ਹੈ।
ਸਮਾਨ ਦੀ ਇਸ ਤਰ੍ਹਾਂ ਕਰੋ ਸੁਰੱਖਿਆ- ਆਪਣੇ ਮੋਬਾਈਲ ਫੋਨ, ਜ਼ਰੂਰੀ ਦਸਤਾਵੇਜ਼ ਅਤੇ ਇਲੈਕਟ੍ਰਾਨਿਕ ਸਮਾਨ ਨੂੰ ਵਾਟਰਪ੍ਰੂਫ ਬੈਗ ਜਾਂ ਪਲਾਸਟਿਕ ਕਵਰ ਵਿੱਚ ਰੱਖੋ। ਮੀਂਹ ਦਾ ਪਾਣੀ ਇਨ੍ਹਾਂ ਦੀ ਕਾਰਗੁਜ਼ਾਰੀ ਨੂੰ ਨੁਕਸਾਨ ਪਹੁੰਚਾ ਸਕਦਾ ਹੈ। ਖਾਸ ਕਰਕੇ ਪਛਾਣ ਪੱਤਰ, ਬੈਂਕ ਕਾਰਡ ਅਤੇ ਦਫ਼ਤਰ ਨਾਲ ਸਬੰਧਤ ਜ਼ਰੂਰੀ ਕਾਗਜ਼ਾਤ ਨੂੰ ਸੁਰੱਖਿਅਤ ਰੱਖਣਾ ਬਹੁਤ ਜ਼ਰੂਰੀ ਹੈ।
ਚੀਜ਼ਾਂ ਦੀ ਸਹੀ ਚੋਣ ਕਰੋ- ਜੁੱਤੀਆਂ-ਚੱਪਲਾਂ ਦੀ ਚੋਣ ਵੀ ਸੋਚ-ਸਮਝ ਕੇ ਕਰੋ। ਮੀਂਹ ਵਿੱਚ ਫਿਸਲਣ ਦਾ ਖਤਰਾ ਵੱਧ ਜਾਂਦਾ ਹੈ, ਇਸ ਲਈ ਅਜਿਹੇ ਫੁੱਟਵੇਅਰ ਪਹਿਨੋ ਜਿਨ੍ਹਾਂ ਦੀ ਪਕੜ ਚੰਗੀ ਹੋਵੇ।
ਵਾਹਨ ਦੀ ਕਰੋ ਜਾਂਚ- ਜੇਕਰ ਤੁਸੀਂ ਵਾਹਨ ਰਾਹੀਂ ਯਾਤਰਾ ਕਰ ਰਹੇ ਹੋ ਤਾਂ ਨਿਕਲਣ ਤੋਂ ਪਹਿਲਾਂ ਉਸ ਦੀ ਜਾਂਚ ਜ਼ਰੂਰ ਕਰ ਲਵੋ। ਕਾਰ ਦੇ ਵਾਈਪਰ, ਹੈੱਡਲਾਈਟ ਅਤੇ ਬ੍ਰੇਕ ਸਹੀ ਤਰੀਕੇ ਨਾਲ ਕੰਮ ਕਰ ਰਹੇ ਹਨ ਜਾਂ ਨਹੀਂ, ਇਹ ਯਕੀਨੀ ਬਣਾਓ। ਦੋਪਹੀਆ ਵਾਹਨ ਚਲਾਉਣ ਵਾਲਿਆਂ ਨੂੰ ਹੈਲਮੈਟ ਦੇ ਨਾਲ ਰੇਨ ਗੀਅਰ ਵੀ ਪਹਿਨਣਾ ਚਾਹੀਦਾ ਹੈ। ਸੜਕ ‘ਤੇ ਪਾਣੀ ਭਰਿਆ ਹੋਣ ਦੀ ਸਥਿਤੀ ਵਿੱਚ ਵਾਹਨ ਹੌਲੀ ਅਤੇ ਸਾਵਧਾਨੀ ਨਾਲ ਚਲਾਓ।
ਬਾਰਿਸ਼ ਵਿੱਚ ਕੱਪੜਿਆਂ ਦੀ ਕਰੋ ਸਹੀ ਚੋਣ- ਬਾਰਿਸ਼ ਦੇ ਮੌਸਮ ਵਿੱਚ ਪਾਣੀ ਅਤੇ ਮੱਛਰਾਂ ਰਾਹੀਂ ਫੈਲਣ ਵਾਲੀਆਂ ਬਿਮਾਰੀਆਂ ਦਾ ਖਤਰਾ ਵੀ ਵੱਧ ਜਾਂਦਾ ਹੈ। ਇਸ ਲਈ ਘਰ ਤੋਂ ਬਾਹਰ ਨਿਕਲਣ ਤੋਂ ਪਹਿਲਾਂ ਪੂਰੀ ਬਾਂਹਾਂ ਵਾਲੇ ਕੱਪੜੇ ਪਹਿਨੋ ਅਤੇ ਮੱਛਰ ਰੋਕੂ ਕ੍ਰੀਮ ਦੀ ਵਰਤੋਂ ਕਰੋ। ਇਸ ਦੇ ਨਾਲ ਹੀ ਬਾਹਰ ਦਾ ਖੁੱਲ੍ਹਾ ਅਤੇ ਅਸਫਾਈ ਵਾਲਾ ਖਾਣਾ ਖਾਣ ਤੋਂ ਬਚੋ।
ਖਾਣ-ਪੀਣ ਦਾ ਰੱਖੋ ਪ੍ਰਬੰਧ- ਆਪਣੇ ਨਾਲ ਪੀਣ ਲਈ ਸਾਫ਼ ਪਾਣੀ ਦੀ ਬੋਤਲ ਜ਼ਰੂਰ ਰੱਖੋ। ਕਈ ਵਾਰ ਬਾਰਿਸ਼ ਵਿੱਚ ਫਸ ਜਾਣ ‘ਤੇ ਸਾਫ਼ ਪਾਣੀ ਉਪਲਬਧ ਨਹੀਂ ਹੋ ਪਾਉਂਦਾ। ਸਰੀਰ ਨੂੰ ਹਾਈਡ੍ਰੇਟ ਰੱਖਣਾ ਵੀ ਬਹੁਤ ਜ਼ਰੂਰੀ ਹੈ।
ਜ਼ਿਆਦਾ ਪਾਣੀ ਵਿੱਚ ਜਾਣ ਤੋਂ ਬਚੋ- ਜੇਕਰ ਰਸਤੇ ਵਿੱਚ ਪਾਣੀ ਭਰਿਆ ਹੋਵੇ ਤਾਂ ਉਸ ਵਿੱਚੋਂ ਲੰਘਣ ਤੋਂ ਬਚੋ। ਟੋਏ, ਖੁੱਲ੍ਹੇ ਮੈਨਹੋਲ ਜਾਂ ਬਿਜਲੀ ਦੀਆਂ ਤਾਰਾਂ ਪਾਣੀ ਵਿੱਚ ਲੁਕੀਆਂ ਹੋ ਸਕਦੀਆਂ ਹਨ, ਜੋ ਗੰਭੀਰ ਹਾਦਸੇ ਦਾ ਕਾਰਨ ਬਣ ਸਕਦੀਆਂ ਹਨ।
-ਬਾਰਿਸ਼ ਦਾ ਮੌਸਮ ਆਨੰਦ ਲੈਣ ਲਈ ਹੁੰਦਾ ਹੈ, ਪਰ ਸੁਰੱਖਿਆ ਅਤੇ ਸਿਹਤ ਨੂੰ ਨਜ਼ਰਅੰਦਾਜ਼ ਨਹੀਂ ਕਰਨਾ ਚਾਹੀਦਾ। ਘਰ ਤੋਂ ਬਾਹਰ ਜਾਣ ਤੋਂ ਪਹਿਲਾਂ ਇਹ ਛੋਟੀਆਂ-ਛੋਟੀਆਂ ਸਾਵਧਾਨੀਆਂ ਅਪਣਾ ਕੇ ਤੁਸੀਂ ਆਪਣੀ ਯਾਤਰਾ ਨੂੰ ਸੁਰੱਖਿਅਤ ਅਤੇ ਆਰਾਮਦਾਇਕ ਬਣਾ ਸਕਦੇ ਹੋ।
EDITED BY- HARLEEN KAUR
