ਪੀਰੀਅਡਸ ਦੌਰਾਨ ਦਰਦ ਹੋਣਾ ਆਮ ਗੱਲ ਹੈ। ਜ਼ਿਆਦਾਤਰ ਔਰਤਾਂ ਨੂੰ ਇਸ ਸਮੇਂ ਹਲਕਾ ਦਰਦ ਜਾਂ ਐਂਠਣ ਮਹਿਸੂਸ ਹੁੰਦੀ ਹੈ ਪਰ ਕੁਝ ਔਰਤਾਂ ਨੂੰ ਦਰਦ ਇੰਨਾ ਜ਼ਿਆਦਾ ਹੁੰਦਾ ਹੈ ਕਿ ਉਨ੍ਹਾਂ ਲਈ ਉੱਠਣਾ-ਬੈਠਣਾ ਜਾਂ ਰੋਜ਼ਾਨਾ ਦੇ ਕੰਮ ਕਰਨਾ ਵੀ ਮੁਸ਼ਕਲ ਹੋ ਜਾਂਦਾ ਹੈ। ਕਈ ਵਾਰ ਇਹ ਦਰਦ ਇੰਨਾ ਗੰਭੀਰ ਹੋ ਸਕਦਾ ਹੈ ਕਿ ਇਸ ਦੀ ਤੀਬਰਤਾ ਹਾਰਟ ਅਟੈਕ ਦੇ ਦਰਦ ਜਿੰਨੀ ਮਹਿਸੂਸ ਹੋ ਸਕਦੀ ਹੈ।
ਕਿਹੜੀਆਂ ਔਰਤਾਂ ਵਿੱਚ ਦਰਦ ਵੱਧ ਹੋ ਸਕਦਾ ਹੈ?
ਡਾਕਟਰ ਦੇ ਅਨੁਸਾਰ ਅਜਿਹਾ ਗੰਭੀਰ ਦਰਦ ਖਾਸ ਤੌਰ ‘ਤੇ ਸੈਕੰਡਰੀ ਡਿਸਮੈਨੋਰਿਆ (Secondary Dysmenorrhea) ਵਾਲੀਆਂ ਔਰਤਾਂ ਵਿੱਚ ਦੇਖਿਆ ਜਾਂਦਾ ਹੈ। ਇਸ ਦਾ ਇੱਕ ਮੁੱਖ ਕਾਰਨ ਐਂਡੋਮੀਟ੍ਰਿਓਸਿਸ (Endometriosis) ਨਾਮ ਦੀ ਬਿਮਾਰੀ ਹੈ, ਜਿਸ ਵਿੱਚ ਪੀਰੀਅਡਸ ਦੌਰਾਨ ਬਹੁਤ ਤੇਜ਼ ਅਤੇ ਅਸਹਿਣ ਦਰਦ ਹੁੰਦਾ ਹੈ।
ਐਂਡੋਮੀਟ੍ਰਿਓਸਿਸ ਕੀ ਹੈ?
ਐਂਡੋਮੀਟ੍ਰਿਓਸਿਸ ਇੱਕ ਅਜਿਹੀ ਬਿਮਾਰੀ ਹੈ ਜਿਸ ਵਿੱਚ ਬੱਚੇਦਾਨੀ (ਗਰਭਾਸ਼ਯ) ਦੀ ਅੰਦਰੂਨੀ ਪਰਤ ਵਰਗੀਆਂ ਕੋਸ਼ਿਕਾਵਾਂ ਗਰਭਾਸ਼ਯ ਤੋਂ ਬਾਹਰ ਵਧਣ ਲੱਗਦੀਆਂ ਹਨ। ਇਹ ਬਿਮਾਰੀ ਅੰਡਾਸ਼ਯ (Ovaries), ਫੈਲੋਪੀਅਨ ਟਿਊਬਾਂ (Fallopian Tubes) ਅਤੇ ਪੈਲਵਿਕ ਹਿੱਸੇ ਨੂੰ ਪ੍ਰਭਾਵਿਤ ਕਰ ਸਕਦੀ ਹੈ। ਕੁਝ ਮਾਮਲਿਆਂ ਵਿੱਚ ਇਹ ਆਂਤਾਂ ਅਤੇ ਮੂਤਰਾਸ਼ਯ ਤੱਕ ਵੀ ਫੈਲ ਸਕਦੀ ਹੈ।
ਇਸ ਕਾਰਨ ਔਰਤਾਂ ਨੂੰ ਪੀਰੀਅਡਸ ਦੌਰਾਨ ਬਹੁਤ ਤੇਜ਼ ਦਰਦ ,ਜ਼ਿਆਦਾ ਖੂਨ ਵਗਣਾ ,ਪੇਟ ਦੇ ਹੇਠਲੇ ਹਿੱਸੇ ਵਿੱਚ ਲਗਾਤਾਰ ਦਰਦ ,ਗਰਭ ਧਾਰਣ ਕਰਨ ਵਿੱਚ ਮੁਸ਼ਕਲ ਵਰਗੀਆਂ ਸਮੱਸਿਆਵਾਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।
ਡਾਕਟਰ ਦੀ ਸਲਾਹ
ਔਰਤਾਂ ਦੇ ਪੀਰੀਅਡਸ ਦੇ ਦਰਦ ਨੂੰ ਕਦੇ ਵੀ ਹਲਕੇ ਵਿੱਚ ਨਹੀਂ ਲੈਣਾ ਚਾਹੀਦਾ। ਜੇਕਰ ਦਰਦ ਹਰ ਮਹੀਨੇ ਇੰਨਾ ਜ਼ਿਆਦਾ ਹੋਵੇ ਕਿ ਰੋਜ਼ਾਨਾ ਦੇ ਕੰਮ ਪ੍ਰਭਾਵਿਤ ਹੋਣ ਲੱਗਣ, ਤਾਂ ਤੁਰੰਤ ਡਾਕਟਰ ਨਾਲ ਸੰਪਰਕ ਕਰਨਾ ਚਾਹੀਦਾ ਹੈ।
EDITED BY- HARLEEN KAUR
