ਦਿੱਲੀ ਏਮਜ਼ ਤੋਂ ਇੱਕ ਬੇਹੱਦ ਦੁਖਦਾਈ ਖ਼ਬਰ ਸਾਹਮਣੇ ਆਈ ਹੈ। ਰਾਜਸਥਾਨ ਦੇ ਕੋਟਾ ਦੀ ਰਹਿਣ ਵਾਲੀ 15 ਸਾਲਾ ਤਨਵੀ, ਜੋ ਬਚਪਨ ਤੋਂ ਹੀ ਦਿਲ ਦੀ ਗੰਭੀਰ ਬਿਮਾਰੀ ਨਾਲ ਜੂਝ ਰਹੀ ਸੀ, ਮੰਗਲਵਾਰ ਨੂੰ ਇਲਾਜ ਦੌਰਾਨ ਦਮ ਤੋੜ ਗਈ। ਤਨਵੀ ਨੂੰ ਮਹਿਜ਼ ਦੋ ਸਾਲ ਦੀ ਉਮਰ ਵਿੱਚ ਦਿਲ ਦੀ ਸਮੱਸਿਆ ਦਾ ਪਤਾ ਲੱਗਿਆ ਸੀ ਅਤੇ ਉਦੋਂ ਤੋਂ ਹੀ ਉਸਦਾ ਪਰਿਵਾਰ ਬਿਹਤਰ ਇਲਾਜ ਦੀ ਉਮੀਦ ਵਿੱਚ ਦਿੱਲੀ ਏਮਜ਼ ਦੇ ਚੱਕਰ ਲਗਾ ਰਿਹਾ ਸੀ। ਕਰੀਬ 13 ਸਾਲਾਂ ਦੀ ਲੰਮੀ ਉਡੀਕ ਦੇ ਬਾਵਜੂਦ ਉਸਦੀ ਸਰਜਰੀ ਨਹੀਂ ਹੋ ਸਕੀ ਅਤੇ ਆਖ਼ਿਰਕਾਰ ਹਾਰਟ-ਲੰਗ ਟ੍ਰਾਂਸਪਲਾਂਟ ਦੀ ਤਿਆਰੀ ਦੌਰਾਨ ਹੀ ਉਸਦੀ ਮੌਤ ਹੋ ਗਈ।
ਤਨਵੀ ਨੂੰ ਸਾਲ 2012 ਵਿੱਚ, ਜਦੋਂ ਉਹ ਕਰੀਬ ਦੋ ਸਾਲ ਦੀ ਸੀ, ਵੈਂਟ੍ਰਿਕੁਲਰ ਡਿਫੈਕਟ ਯਾਨੀ ਦਿਲ ਵਿੱਚ ਛੇਦ ਅਤੇ ਪਲਮੋਨਰੀ ਐਟ੍ਰੇਸੀਆ ਨਾਮ ਦੀ ਬਿਮਾਰੀ ਦਾ ਪਤਾ ਲੱਗਿਆ ਸੀ। ਇਸ ਬਿਮਾਰੀ ਵਿੱਚ ਫੇਫੜਿਆਂ ਤੱਕ ਖੂਨ ਪਹੁੰਚਾਉਣ ਵਾਲੀਆਂ ਨਸਾਂ ਠੀਕ ਤਰੀਕੇ ਨਾਲ ਕੰਮ ਨਹੀਂ ਕਰਦੀਆਂ। ਇਸ ਕਾਰਨ ਸਰੀਰ ਵਿੱਚ ਆਕਸੀਜਨ ਦੀ ਕਮੀ, ਸਾਹ ਚੜ੍ਹਨਾ ਅਤੇ ਥਕਾਵਟ ਵਰਗੀਆਂ ਸਮੱਸਿਆਵਾਂ ਬਣੀਆਂ ਰਹਿੰਦੀਆਂ ਹਨ। ਕਿਸੇ ਜਾਣ-ਪਛਾਣ ਵਾਲੇ ਦੀ ਸਲਾਹ ’ਤੇ ਪਰਿਵਾਰ ਤਨਵੀ ਨੂੰ ਇਲਾਜ ਲਈ ਦਿੱਲੀ ਏਮਜ਼ ਲੈ ਕੇ ਆਇਆ ਸੀ। ਸਾਲ 2013 ਵਿੱਚ ਉਸਦੀ ਸਰਜਰੀ ਸਬੰਧੀ ਜਾਂਚ ਵੀ ਕੀਤੀ ਗਈ ਸੀ, ਪਰ ਬਾਅਦ ਵਿੱਚ ਮਾਮਲਾ ਲਗਾਤਾਰ ਟਲਦਾ ਗਿਆ।
ਏਮਜ਼ ਦੇ ਸੀਟੀਵੀਐਸ ਵਿਭਾਗ ਦੇ ਡਾਕਟਰਾਂ ਮੁਤਾਬਕ, ਸਾਲ 2018 ਵਿੱਚ ਹੋਈ ਜਾਂਚ ਦੌਰਾਨ ਸਾਹਮਣੇ ਆਇਆ ਕਿ ਤਨਵੀ ਦੇ ਫੇਫੜਿਆਂ ਤੱਕ ਖੂਨ ਪਹੁੰਚਾਉਣ ਵਾਲੀਆਂ ਮੁੱਖ ਨਸਾਂ ਹੀ ਠੀਕ ਤਰ੍ਹਾਂ ਮੌਜੂਦ ਨਹੀਂ ਸਨ ਅਤੇ ਉਸਦੇ ਦਿਲ ਦੀ ਬਣਤਰ ਬਹੁਤ ਗੁੰਝਲਦਾਰ ਹੋ ਚੁੱਕੀ ਸੀ। ਡਾਕਟਰਾਂ ਦਾ ਮੰਨਣਾ ਸੀ ਕਿ ਅਜਿਹੀ ਹਾਲਤ ਵਿੱਚ ਸਰਜਰੀ ਕਰਨਾ ਜਾਨਲੇਵਾ ਸਾਬਤ ਹੋ ਸਕਦਾ ਹੈ। ਇਸ ਲਈ ਉਸ ਸਮੇਂ ਆਪਰੇਸ਼ਨ ਨਹੀਂ ਕੀਤਾ ਗਿਆ ਅਤੇ ਤਨਵੀ ਦਾ ਇਲਾਜ ਦਵਾਈਆਂ ਰਾਹੀਂ ਹੀ ਜਾਰੀ ਰੱਖਿਆ ਗਿਆ। ਇਸ ਤੋਂ ਬਾਅਦ ਪਰਿਵਾਰ ਨੂੰ ਹਾਰਟ-ਲੰਗ ਟ੍ਰਾਂਸਪਲਾਂਟ ਦੇ ਵਿਕਲਪ ਬਾਰੇ ਦੱਸਿਆ ਗਿਆ ਸੀ।
ਤਨਵੀ ਦੇ ਪਿਤਾ ਪਿਛਲੇ ਹਫ਼ਤੇ ਉਸਨੂੰ ਗੰਭੀਰ ਹਾਲਤ ਵਿੱਚ ਏਮਜ਼ ਲੈ ਕੇ ਪਹੁੰਚੇ ਸਨ। ਡਾਕਟਰਾਂ ਨੇ ਹਾਰਟ-ਲੰਗ ਟ੍ਰਾਂਸਪਲਾਂਟ ਦੀ ਸੰਭਾਵਨਾ ਨੂੰ ਧਿਆਨ ਵਿੱਚ ਰੱਖਦਿਆਂ ਉਸਨੂੰ ਹਸਪਤਾਲ ਵਿੱਚ ਦਾਖ਼ਲ ਕੀਤਾ। ਜ਼ਰੂਰੀ ਜਾਂਚਾਂ ਸ਼ੁਰੂ ਕੀਤੀਆਂ ਗਈਆਂ ਅਤੇ ਸੋਮਵਾਰ ਸ਼ਾਮ ਨੂੰ ਉਸਦੀ ਐਂਡੋਸਕੋਪੀ ਵੀ ਕੀਤੀ ਗਈ। ਟ੍ਰਾਂਸਪਲਾਂਟ ਦੀਆਂ ਤਿਆਰੀਆਂ ਚੱਲ ਰਹੀਆਂ ਸਨ ਕਿ ਮੰਗਲਵਾਰ ਨੂੰ ਕਰੀਬ 2 ਵਜੇ ਤਨਵੀ ਦੀ ਸਿਹਤ ਅਚਾਨਕ ਵਿਗੜ ਗਈ। ਡਾਕਟਰਾਂ ਨੇ ਉਸਨੂੰ ਬਚਾਉਣ ਦੀ ਪੂਰੀ ਕੋਸ਼ਿਸ਼ ਕੀਤੀ, ਪਰ ਸਵੇਰੇ ਕਰੀਬ 5 ਵਜੇ ਕਾਰਡਿਅਕ ਅਰੇਸਟ ਕਾਰਨ ਉਸਨੂੰ ਮ੍ਰਿਤਕ ਐਲਾਨ ਦਿੱਤਾ ਗਿਆ।
ਤਨਵੀ ਦੇ ਮਾਤਾ-ਪਿਤਾ ਦਾ ਆਰੋਪ ਹੈ ਕਿ ਜੇਕਰ ਸਮੇਂ ਸਿਰ ਉਨ੍ਹਾਂ ਦੀ ਧੀ ਦੀ ਸਰਜਰੀ ਕਰ ਦਿੱਤੀ ਜਾਂਦੀ ਤਾਂ ਸ਼ਾਇਦ ਉਸਦੀ ਜਾਨ ਬਚ ਸਕਦੀ ਸੀ। ਉਨ੍ਹਾਂ ਦਾ ਕਹਿਣਾ ਹੈ ਕਿ 13 ਸਾਲ ਤੱਕ ਏਮਜ਼ ਦੇ ਚੱਕਰ ਲਗਾਉਣ ਦੇ ਬਾਵਜੂਦ ਧੀ ਨੂੰ ਸਹੀ ਇਲਾਜ ਨਹੀਂ ਮਿਲ ਸਕਿਆ। ਦੂਜੇ ਪਾਸੇ ਏਮਜ਼ ਪ੍ਰਸ਼ਾਸਨ ਦਾ ਕਹਿਣਾ ਹੈ ਕਿ ਤਨਵੀ ਦੇ ਮਾਮਲੇ ਵਿੱਚ ਡਾਕਟਰਾਂ ਨੇ ਪਹਿਲਾਂ ਹੀ ਸਰਜਰੀ ਨੂੰ ਸੁਰੱਖਿਅਤ ਨਹੀਂ ਮੰਨਿਆ ਸੀ। ਇਸੇ ਕਾਰਨ ਉਸਦਾ ਇਲਾਜ ਦਵਾਈਆਂ ਰਾਹੀਂ ਕੀਤਾ ਜਾ ਰਿਹਾ ਸੀ ਅਤੇ ਆਪਰੇਸ਼ਨ ਦਾ ਜੋਖ਼ਮ ਨਹੀਂ ਲਿਆ ਗਿਆ।
ਤਨਵੀ ਦੀ ਮੌਤ ਨੇ ਇੱਕ ਵੱਡਾ ਸਵਾਲ ਵੀ ਖੜ੍ਹਾ ਕਰ ਦਿੱਤਾ ਹੈ ਕਿ ਜਨਮ ਤੋਂ ਦਿਲ ਦੀ ਗੰਭੀਰ ਬਿਮਾਰੀ ਨਾਲ ਜੂਝ ਰਹੇ ਬੱਚਿਆਂ ਨੂੰ ਸਮੇਂ ਸਿਰ ਸਹੀ ਇਲਾਜ ਅਤੇ ਸਰਜਰੀ ਆਖ਼ਿਰ ਕਿਉਂ ਨਹੀਂ ਮਿਲ ਪਾਉਂਦੀ। ਫਿਲਹਾਲ ਪਰਿਵਾਰ ਵੱਲੋਂ ਲਗਾਏ ਗਏ ਦੋਸ਼ਾਂ ਅਤੇ ਹਸਪਤਾਲ ਵਿੱਚ ਹੋਏ ਪੂਰੇ ਇਲਾਜ ਦੀ ਪ੍ਰਕਿਰਿਆ ਦੀ ਜਾਂਚ ਤੋਂ ਬਾਅਦ ਹੀ ਇਹ ਸਪੱਸ਼ਟ ਹੋਵੇਗਾ ਕਿ ਦੇਰੀ ਬਿਮਾਰੀ ਦੀ ਗੰਭੀਰਤਾ ਕਾਰਨ ਹੋਈ ਜਾਂ ਇਲਾਜ ਦੀ ਵਿਵਸਥਾ ਵਿੱਚ ਕਿਤੇ ਕੋਈ ਲਾਪਰਵਾਹੀ ਹੋਈ ਸੀ।
EDITED BY- HARLEEN KAUR
