Gulzar Singh ਦੀ ਮੌਤ ਮਾਮਲੇ ‘ਚ ਪਰਿਵਾਰ ਦਾ ਵੱਡਾ ਦਾਅਵਾ

ਪਰਿਵਾਰ ਨੇ ਕਿਹਾ ਕਿ ਗੁਲਜ਼ਾਰ ਸਿੰਘ ਨੇ ਮੌਤ ਤੋਂ ਪਹਿਲਾਂ ਬਣਾਈਆਂ ਵੀਡੀਓਜ਼ ਵਿੱਚ ਮੰਤਰੀ ਹਰਪਾਲ ਸਿੰਘ ਚੀਮਾ, ਮੌਜੂਦਾ ਸਰਪੰਚ, ਸਰਪੰਚ ਦੇ ਪਤੀ ਅਤੇ ਕੁਝ ਹੋਰ ਲੋਕਾਂ ਦੇ ਨਾਮ ਲਏ ਸਨ। ਪਰਿਵਾਰ ਦੀ ਮੰਗ ਹੈ ਕਿ ਵੀਡੀਓ ਦੇ ਆਧਾਰ ‘ਤੇ ਸਾਰਿਆਂ ਖ਼ਿਲਾਫ਼ ਤੁਰੰਤ FIR ਦਰਜ ਕਰਕੇ ਕਾਰਵਾਈ ਕੀਤੀ ਜਾਵੇ। ਉਨ੍ਹਾਂ ਕਿਹਾ ਕਿ ਜਦੋਂ ਤੱਕ ਦੋਸ਼ੀਆਂ ਦੀ ਗ੍ਰਿਫ਼ਤਾਰੀ ਨਹੀਂ ਹੁੰਦੀ, ਉਦੋਂ ਤੱਕ ਉਹ ਫੁੱਲ ਚੁਗਣ ਅਤੇ ਭੋਗ ਪਾਉਣ ਵਰਗੀਆਂ ਅਗਲੀਆਂ ਧਾਰਮਿਕ ਰਸਮਾਂ ਨਹੀਂ ਕਰਨਗੇ।

ਮ੍ਰਿਤਕ ਦੀ ਮਾਂ ਜਸਵੰਤ ਕੌਰ ਨੇ ਦੱਸਿਆ ਕਿ ਪਿੰਡ ਦੇ ਗੁਰਦੁਆਰਾ ਸਾਹਿਬ ਵਿੱਚ 6 ਸਤੰਬਰ ਨੂੰ ਕੈਬਨਿਟ ਮੰਤਰੀ ਦੀ ਮੀਟਿੰਗ ਸੀ। ਗੁਲਜ਼ਾਰ ਉੱਥੇ ਇਲਾਕੇ ਵਿੱਚ ਵਿਕ ਰਹੇ ਨਸ਼ੇ ਦੀ ਸ਼ਿਕਾਇਤ ਲੈ ਕੇ ਗਿਆ ਸੀ। ਉਸ ਨੇ ਮੰਤਰੀ ਦੇ ਪੈਰ ਛੂਹ ਕੇ ਕਿਹਾ ਕਿ ਨਸ਼ਾ ਬੰਦ ਕਰਵਾਇਆ ਜਾਵੇ, ਕਿਉਂਕਿ ਉਸ ਦਾ ਪੁੱਤਰ ਰੋਜ਼ ਨਸ਼ਾ ਕਰਦਾ ਹੈ। ਉਸ ਨੇ ਸਵਾਲ ਕੀਤਾ ਕਿ ਜੇ ਨਸ਼ਾ ਖ਼ਤਮ ਹੋ ਗਿਆ ਹੈ ਤਾਂ ਉਸ ਨੂੰ ਨਸ਼ਾ ਕਿੱਥੋਂ ਮਿਲ ਰਿਹਾ ਹੈ। ਇਸ ‘ਤੇ ਮੰਤਰੀ ਚੀਮਾ ਨੇ ਉਸ ਨੂੰ ਆਪਣੇ ਕੋਲ ਭੇਜਣ ਲਈ ਕਿਹਾ।

ਜਸਵੰਤ ਕੌਰ ਦਾ ਆਰੋਪ ਹੈ ਕਿ ਗੁਰਦੁਆਰਾ ਸਾਹਿਬ ਦੇ ਪ੍ਰਧਾਨ ਸੁੱਖਾ ਕੰਡਕਟਰ ਨੇ ਗੁਲਜ਼ਾਰ ‘ਤੇ ਨਸ਼ਾ ਕਰਨ ਦਾ ਆਰੋਪ ਲਗਾਇਆ ਅਤੇ ਉਸ ਨੂੰ ਧੱਕੇ ਮਾਰ ਕੇ ਬਾਹਰ ਕੱਢ ਦਿੱਤਾ। ਇਸ ਗੱਲ ਨੂੰ ਲੈ ਕੇ ਮੰਤਰੀ ਦੇ ਸਾਹਮਣੇ ਹੀ ਕਾਫ਼ੀ ਬਹਿਸ ਹੋਈ।

ਘਟਨਾ ਤੋਂ ਬਾਅਦ ਪੁਲਿਸ ਗੁਲਜ਼ਾਰ ਨੂੰ ਆਪਣੀ ਗੱਡੀ ਵਿੱਚ ਲੈ ਗਈ ਅਤੇ ਕੁਝ ਸਮੇਂ ਬਾਅਦ ਉਸ ਨੂੰ ਘਰ ਛੱਡ ਗਈ। ਆਰੋਪ ਹੈ ਕਿ ਮੀਟਿੰਗ ਖ਼ਤਮ ਹੋਣ ਤੋਂ ਬਾਅਦ ਪੰਚਾਇਤ ਮੈਂਬਰਾਂ ਨੇ ਉਸ ਨੂੰ ਡਰਾਉਣਾ-ਧਮਕਾਉਣਾ ਸ਼ੁਰੂ ਕਰ ਦਿੱਤਾ। ਸਰਪੰਚ ਨੇ ਗੁਲਜ਼ਾਰ ਦੀ ਪਤਨੀ ਨੂੰ ਫੋਨ ਕਰਕੇ ਕਿਹਾ ਕਿ ਉਸ ਨੇ ਠੀਕ ਨਹੀਂ ਕੀਤਾ ਅਤੇ ਉਸ ਨੂੰ ਮੁਆਫ਼ੀ ਮੰਗਣੀ ਪਵੇਗੀ।

ਗੁਲਜ਼ਾਰ ਦੀ ਭਾਬੀ ਨੇ ਦੱਸਿਆ ਕਿ ਕੁਝ ਲੋਕ ਉਨ੍ਹਾਂ ਦੇ ਘਰ ਆਏ ਅਤੇ ਗਾਲੀ-ਗਲੌਚ ਕਰਦੇ ਹੋਏ ਧਮਕੀ ਦਿੱਤੀ ਕਿ ਗੁਲਜ਼ਾਰ ਦਾ ਮੂੰਹ ਕਾਲਾ ਕਰਕੇ ਉਸ ਨੂੰ ਪੂਰੇ ਪਿੰਡ ਵਿੱਚ ਘੁਮਾਇਆ ਜਾਵੇਗਾ ਅਤੇ ਮੁਆਫ਼ੀ ਮੰਗਵਾਈ ਜਾਵੇਗੀ। ਪਰਿਵਾਰ ਦਾ ਆਰੋਪ ਹੈ ਕਿ ਇਸ ਬੇਇੱਜ਼ਤੀ ਅਤੇ ਡਰ ਦੇ ਮਾਹੌਲ ਕਾਰਨ ਗੁਲਜ਼ਾਰ ਦਬਾਅ ਵਿੱਚ ਆ ਗਿਆ।

ਮਾਂ ਜਸਵੰਤ ਕੌਰ ਮੁਤਾਬਕ ਕੁਝ ਲੋਕ ਮੁੜ ਘਰ ਆਏ ਅਤੇ ਕਿਹਾ ਕਿ ‘ਡਿਪਟੀ ਸਾਹਿਬ’ ਨੇ ਗੁਲਜ਼ਾਰ ਨੂੰ ਬੁਲਾਇਆ ਹੈ। ਜਦੋਂ ਪਰਿਵਾਰ ਨੇ ਨਾਲ ਜਾਣ ਦੀ ਗੱਲ ਕੀਤੀ ਤਾਂ ਉਹ ਟਾਲਮਟੋਲ ਕਰਨ ਲੱਗੇ। ਗੁਲਜ਼ਾਰ ਨੂੰ ਜਦੋਂ ਪਤਾ ਲੱਗਾ ਕਿ ਉਸ ‘ਤੇ ਮੂੰਹ ਕਾਲਾ ਕਰਕੇ ਮੁਆਫ਼ੀ ਮੰਗਣ ਦਾ ਦਬਾਅ ਬਣਾਇਆ ਜਾ ਰਿਹਾ ਹੈ ਤਾਂ ਉਹ ਦਿੜ੍ਹਬਾ ਚਲਾ ਗਿਆ ਅਤੇ 7 ਸਤੰਬਰ ਨੂੰ ਜ਼ਹਿਰੀਲੀ ਚੀਜ਼ ਨਿਗਲ ਲਈ।

ਮੌਤ ਤੋਂ ਪਹਿਲਾਂ ਗੁਲਜ਼ਾਰ ਸਿੰਘ ਦੀ ਇੱਕ ਵੀਡੀਓ ਸਾਹਮਣੇ ਆਈ ਹੈ। ਵੀਡੀਓ ਵਿੱਚ ਉਹ ਖੜ੍ਹਾ ਦਿਖਾਈ ਦੇ ਰਿਹਾ ਹੈ ਅਤੇ ਇੱਕ ਵਿਅਕਤੀ ਨੇ ਉਸ ਨੂੰ ਫੜਿਆ ਹੋਇਆ ਹੈ। ਉਸ ਸਮੇਂ ਤੱਕ ਉਹ ਸਲਫਾਸ ਨਿਗਲ ਚੁੱਕਾ ਸੀ। ਵੀਡੀਓ ਵਿੱਚ ਉਹ ਕੁਝ ਲੋਕਾਂ ਦੇ ਨਾਮ ਲੈਂਦਾ ਹੋਇਆ ਕਹਿੰਦਾ ਹੈ ਕਿ ਉਹ ਉੱਥੇ ਚਿੱਟੇ ਦੀ ਗੱਲ ਕਰਨ ਗਿਆ ਸੀ। ਗੁਲਜ਼ਾਰ ਕਹਿੰਦਾ ਹੈ ਕਿ ਉਸ ਨੇ ਚਿੱਟੇ ਕਾਰਨ ਆਪਣੀ ਜੀਵਨ ਲੀਲਾ ਖ਼ਤਮ ਕਰ ਲਈ। ਇਸ ਤੋਂ ਬਾਅਦ ਇੱਕ ਹੋਰ ਵਿਅਕਤੀ ਉਸ ਨੂੰ ਦਵਾਈ ਦਿਵਾਉਣ ਲਈ ਲੈ ਜਾਣ ਦੀ ਗੱਲ ਕਰਦਾ ਹੈ।

ਗੁਲਜ਼ਾਰ ਸਿੰਘ ਨੂੰ ਇਲਾਜ ਲਈ ਪਹਿਲਾਂ ਸੰਗਰੂਰ, ਫਿਰ ਪਟਿਆਲਾ ਅਤੇ ਲੁਧਿਆਣਾ ਲਿਜਾਇਆ ਗਿਆ। ਇਸ ਦੌਰਾਨ ਦੀ ਇੱਕ ਹੋਰ ਵੀਡੀਓ ਵੀ ਸਾਹਮਣੇ ਆਈ, ਜਿਸ ਵਿੱਚ ਉਸ ਨੇ ਚੀਮਾ, ਸਰਪੰਚ, ਸਰਪੰਚ ਦੇ ਪਤੀ ਅਤੇ ਕੁਝ ਹੋਰ ਲੋਕਾਂ ਨੂੰ ਆਪਣੀ ਮੌਤ ਲਈ ਜ਼ਿੰਮੇਵਾਰ ਦੱਸਿਆ। ਬਾਅਦ ਵਿੱਚ DMC ਵਿੱਚ ਉਸ ਦੀ ਮੌਤ ਹੋ ਗਈ।

EDITED BY- HARLEEN KAUR