ਦੇਸ਼ ਭਰ ਵਿੱਚ ਜਨਮ ਅਸ਼ਟਮੀ ਦੀਆਂ ਤਿਆਰੀਆਂ ਜੋਰਾਂ ‘ਤੇ ਹਨ। ਇਸ ਪਵਿੱਤਰ ਤਿਉਹਾਰ ਨੂੰ ਖੁਸ਼ੀਆਂ ਅਤੇ ਰੌਣਕ ਨਾਲ ਮਨਾਉਣ ਲਈ ਲੋਕ ਵੱਖ-ਵੱਖ ਢੰਗ ਨਾਲ ਤਿਆਰੀ ਕਰ ਰਹੇ ਹਨ। ਸ਼ਹਿਰ ਦੇ ਰਾਮਲੀਲਾ ਮੈਦਾਨ ਵਿੱਚ ਇਸ ਵਾਰ ਵੱਡਾ ਜਨਮਾਸ਼ਟਮੀ ਮੇਲਾ ਲਗਾਇਆ ਜਾ ਰਿਹਾ ਹੈ, ਜਿਸ ਵਿੱਚ ਲੋਕਾਂ ਦੇ ਮਨੋਰੰਜਨ ਲਈ ਵੱਡੇ ਝੂਲੇ ਅਤੇ ਖਾਣ-ਪੀਣ ਦੇ ਖਾਸ ਸਟਾਲ ਲਗਾਏ ਗਏ ਹਨ।
ਝੂਲੇ ਲਗਾਉਣ ਵਾਲੀਆਂ ਕੰਪਨੀਆਂ ਦੇ ਮੈਨੇਜਰ ਨੇ ਦੱਸਿਆ ਕਿ ਇਹ ਉਨ੍ਹਾਂ ਦਾ ਪੁਰਖਿਆਂ ਤੋਂ ਚੱਲਦਾ ਆ ਰਿਹਾ ਕੰਮ ਹੈ। ਉਨ੍ਹਾਂ ਕਿਹਾ ਕਿ ਸ਼੍ਰੀਨਗਰ ਤੋਂ ਇਲਾਵਾ ਉਹ ਦੇਸ਼ ਦੇ ਲਗਭਗ ਹਰ ਰਾਜ ਵਿੱਚ ਮੇਲੇ ਲਗਾ ਚੁੱਕੇ ਹਨ। ਝੂਲਿਆਂ ਨੂੰ ਫਿੱਟ ਕਰਨ ਦਾ ਕੰਮ ਦੋ ਹਫ਼ਤੇ ਪਹਿਲਾਂ ਸ਼ੁਰੂ ਕੀਤਾ ਗਿਆ ਸੀ, ਕਿਉਂਕਿ ਇਨ੍ਹਾਂ ਨੂੰ ਤਿਆਰ ਕਰਨ ਅਤੇ ਸੁਰੱਖਿਆ ਦੀ ਜਾਂਚ ਕਰਨ ਵਿੱਚ ਕਾਫ਼ੀ ਸਮਾਂ ਲੱਗਦਾ ਹੈ। ਸਾਰੇ ਟ੍ਰਾਇਲ ਮੁਕੰਮਲ ਹੋਣ ਤੋਂ ਬਾਅਦ, ਹੁਣ ਇਹ ਝੂਲੇ ਲੋਕਾਂ ਲਈ ਖੋਲ੍ਹੇ ਜਾ ਚੁੱਕੇ ਹਨ।
ਮੇਲੇ ਵਿੱਚ ਲੋਕਾਂ ਲਈ ਬਹੁਤ ਸਾਰੇ ਮਨੋਰੰਜਨ ਦੇ ਸਾਧਨ ਉਪਲਬਧ ਹਨ। ਇੱਥੇ ਡਰੈਗਨ ਟ੍ਰੇਨ, ਬ੍ਰੇਕ ਡਾਂਸ, ਜਾਇੰਟ ਵ੍ਹੀਲ ਵਰਗੇ ਵੱਡੇ ਅਤੇ ਰੰਗ-ਬਰੰਗੇ ਝੂਲੇ ਖਾਸ ਆਕਰਸ਼ਣ ਹਨ। ਵੱਡਿਆਂ ਦੇ ਨਾਲ-ਨਾਲ ਬੱਚਿਆਂ ਲਈ ਵੀ ਛੋਟੇ ਅਤੇ ਸੁਰੱਖਿਅਤ ਝੂਲੇ ਲਗਾਏ ਗਏ ਹਨ ਤਾਂ ਜੋ ਹਰ ਉਮਰ ਦੇ ਲੋਕ ਮੇਲੇ ਦਾ ਆਨੰਦ ਮਾਣ ਸਕਣ।
ਇਸ ਮੇਲੇ ਦੀ ਖਾਸ ਗੱਲ ਇਹ ਹੈ ਕਿ ਇੱਥੇ ਮਨੋਰੰਜਨ ਦੇ ਨਾਲ-ਨਾਲ ਖਰੀਦਦਾਰੀ ਅਤੇ ਖਾਣ-ਪੀਣ ਦੇ ਵੀ ਪੂਰੇ ਇੰਤਜ਼ਾਮ ਹਨ। ਔਰਤਾਂ ਅਤੇ ਬੱਚਿਆਂ ਲਈ ਕਪੜੇ, ਖਿਡੌਣੇ ਅਤੇ ਗਹਿਣਿਆਂ ਦੇ ਸਟਾਲ ਲਗਾਏ ਗਏ ਹਨ। ਖਾਣ-ਪੀਣ ਦੇ ਸ਼ੌਕੀਨਾਂ ਲਈ ਇੱਥੇ ਭਾਰਤੀ ਪਕਵਾਨਾਂ ਦੇ ਨਾਲ-ਨਾਲ ਵਿਦੇਸ਼ੀ ਖਾਣਿਆਂ ਦੇ ਸਟਾਲ ਵੀ ਲਗਾਏ ਗਏ ਹਨ।
EDITED BY- HARLEEN KAUR
