ਜੇ ਦੰਦ ਸਾਫ਼ ਕਰਦੇ ਸਮੇਂ ਜਾਂ ਖਾਣਾ ਚਬਾਉਂਦੇ ਹੋਏ ਤੁਹਾਡੇ ਮਸੂੜਿਆਂ ਤੋਂ ਖੂਨ ਆਉਂਦਾ ਹੈ, ਤਾਂ ਇਸ ਨੂੰ ਕਦੇ ਵੀ ਹਲਕੀ ਗੱਲ ਨਾ ਸਮਝੋ। ਬਹੁਤ ਸਾਰੇ ਲੋਕ ਇਸ ਨੂੰ ਆਮ ਸਮੱਸਿਆ ਮੰਨ ਕੇ ਨਜ਼ਰਅੰਦਾਜ਼ ਕਰ ਦਿੰਦੇ ਹਨ, ਪਰ ਅਸਲ ਵਿੱਚ ਇਹ ਓਰਲ ਹੈਲਥ ਹੀ ਨਹੀਂ, ਸਗੋਂ ਪੂਰੇ ਸਰੀਰ ਦੀ ਸਿਹਤ ਨਾਲ ਵੀ ਜੁੜਿਆ ਸੰਕੇਤ ਹੋ ਸਕਦਾ ਹੈ। ਸਮੇਂ ਸਿਰ ਧਿਆਨ ਨਾ ਦਿੱਤਾ ਜਾਵੇ, ਤਾਂ ਦੰਦ ਕਮਜ਼ੋਰ ਹੋ ਸਕਦੇ ਹਨ ਅਤੇ ਪਾਇਰੀਆ ਵਰਗੀਆਂ ਗੰਭੀਰ ਬਿਮਾਰੀਆਂ ਦਾ ਖ਼ਤਰਾ ਵਧ ਸਕਦਾ ਹੈ।
ਆਯੁਰਵੇਦ ਅਨੁਸਾਰ, ਮੂੰਹ ਅਤੇ ਦੰਦ ਸਰੀਰ ਦੇ ਅੰਦਰਲੇ ਸੰਤੁਲਨ ਨੂੰ ਦਰਸਾਉਂਦੇ ਹਨ। ਆਯੁਰਵੇਦ ਵਿੱਚ ਤਿੰਨ ਮੁੱਖ ਦੋਸ਼ ਮੰਨੇ ਜਾਂਦੇ ਹਨ—ਵਾਤ, ਪਿੱਤ ਅਤੇ ਕਫ਼। ਜਦੋਂ ਇਹਨਾਂ ਵਿੱਚੋਂ ਕੋਈ ਵੀ ਦੋਸ਼ ਅਸੰਤੁਲਿਤ ਹੋ ਜਾਂਦਾ ਹੈ, ਤਾਂ ਉਸ ਦਾ ਪ੍ਰਭਾਵ ਮੂੰਹ ਵਿੱਚ ਦਿਖਾਈ ਦੇਣ ਲੱਗ ਪੈਂਦਾ ਹੈ।
ਜੇ ਮੂੰਹ ਵਿੱਚ ਵਾਰ-ਵਾਰ ਕਫ਼ ਜਾਂ ਚਿਪਚਿਪਾਹਟ ਬਣਦੀ ਹੈ ਅਤੇ ਦੰਦਾਂ ‘ਤੇ ਜ਼ਿਆਦਾ ਪਲਾਕ ਜਮਦਾ ਹੈ, ਤਾਂ ਇਹ ਕਫ਼ ਦੋਸ਼ ਦੇ ਵਧਣ ਦਾ ਸੰਕੇਤ ਹੋ ਸਕਦਾ ਹੈ। ਦੰਦਾਂ ਵਿੱਚ ਦਰਦ, ਬੁੱਲ੍ਹਾਂ ਦਾ ਸੁੱਕਣਾ ਜਾਂ ਕੈਵਿਟੀ ਵਾਤ ਦੋਸ਼ ਨਾਲ ਜੁੜੇ ਲੱਛਣ ਹਨ। ਮਸੂੜਿਆਂ ਤੋਂ ਖੂਨ ਆਉਣਾ, ਛਾਲੇ ਅਤੇ ਜਲਨ ਪਿੱਤ ਦੋਸ਼ ਦੇ ਵਿਗੜਣ ਦਾ ਇਸ਼ਾਰਾ ਮੰਨੇ ਜਾਂਦੇ ਹਨ।
ਮਸੂੜਿਆਂ ਤੋਂ ਖੂਨ ਆਉਣਾ ਖ਼ਤਰਨਾਕ ਇਸ ਲਈ ਹੈ ਕਿਉਂਕਿ ਇਹ ਦੰਦਾਂ ਦੀਆਂ ਜੜ੍ਹਾਂ ਦੇ ਕਮਜ਼ੋਰ ਹੋਣ, ਇੰਫੈਕਸ਼ਨ ਅਤੇ ਇਮਿਊਨ ਸਿਸਟਮ ਦੀ ਕਮੀ ਵੱਲ ਵੀ ਇਸ਼ਾਰਾ ਕਰ ਸਕਦਾ ਹੈ। ਸਮੇਂ ‘ਤੇ ਇਲਾਜ ਨਾ ਹੋਵੇ, ਤਾਂ ਦੰਦ ਹਿੱਲਣ ਲੱਗ ਪੈਂਦੇ ਹਨ।
ਇੰਝ ਮਿਲੇਗੀ ਮਦਦ
ਆਯੁਰਵੇਦ ਵਿੱਚ ਆਂਵਲਾ ਨੂੰ ਮਸੂੜਿਆਂ ਲਈ ਇੱਕ ਪ੍ਰਭਾਵਸ਼ਾਲੀ ਦਵਾਈ ਮੰਨਿਆ ਜਾਂਦਾ ਹੈ। ਆਂਵਲਾ ਪਿੱਤ ਦੋਸ਼ ਨੂੰ ਸ਼ਾਂਤ ਕਰਦਾ ਹੈ, ਸੋਜਸ਼ ਘਟਾਉਂਦਾ ਹੈ ਅਤੇ ਹਾਨੀਕਾਰਕ ਬੈਕਟੀਰੀਆ ਨੂੰ ਖਤਮ ਕਰਨ ਵਿੱਚ ਮਦਦ ਕਰਦਾ ਹੈ।
ਆਂਵਲਾ ਵਰਤਣ ਦਾ ਤਰੀਕਾ:
ਇੱਕ ਚਮਚ ਸ਼ੁੱਧ ਆਂਵਲਾ ਪਾਊਡਰ ਵਿੱਚ ਥੋੜ੍ਹਾ ਪਾਣੀ ਮਿਲਾ ਕੇ ਪੇਸਟ ਬਣਾਓ। ਇਸ ਪੇਸਟ ਨਾਲ ਹੌਲੀ-ਹੌਲੀ ਮਸੂੜਿਆਂ ਦੀ ਮਸਾਜ ਕਰੋ। 2–3 ਮਿੰਟ ਬਾਅਦ ਗੁੰਨਗੁਣੇ ਪਾਣੀ ਨਾਲ ਕੁੱਲਾ ਕਰ ਲਓ। ਨਿਯਮਿਤ ਤੌਰ ‘ਤੇ ਲਗਭਗ 45 ਦਿਨ ਇਹ ਉਪਾਅ ਕਰਨ ਨਾਲ ਮਸੂੜਿਆਂ ਤੋਂ ਖੂਨ ਆਉਣਾ ਘੱਟ ਹੋ ਸਕਦਾ ਹੈ ਅਤੇ ਦੰਦ ਮਜ਼ਬੂਤ ਮਹਿਸੂਸ ਹੁੰਦੇ ਹਨ।
EDITED BY- HARLEEN KAUR
