ਤਰਨਤਾਰਨ ‘ਚ ਇੱਕ ਸਰਕਾਰੀ ਕਾਲਜ ਦੇ ਮੁਲਾਜ਼ਮ ਨੇ ਆਪਣੀ ਜਾਨ ਗੁਆ ਦਿੱਤੀ ਹੈ। ਮਰਨ ਤੋਂ ਪਹਿਲਾਂ ਉਸਨੇ ਇੱਕ ਵੀਡੀਓ ਰਿਕਾਰਡ ਕੀਤੀ ,ਜਿਸ ਵਿੱਚ ਉਸਨੇ ਆਪਣੀ ਮੌਤ ਲਈ ਕਾਲਜ ਦੇ ਸੁਪਰਡੈਂਟ ਨੂੰ ਜ਼ਿੰਮੇਵਾਰ ਠਹਿਰਾਇਆ। ਵੀਡੀਓ ਵਿੱਚ ਮੁਲਾਜ਼ਮ ਨੇ ਕਿਹਾ ਕਿ ਪਿਛਲੇ ਇੱਕ ਸਾਲ ਤੋਂ ਜਗਤਾਰ ਸਿੰਘ ਕਲਰਕ, ਜੋ ਪਿਛਲੇ ਮਹੀਨੇ ਹੀ ਸੁਪਰਿੰਟੈਂਡੈਂਟ ਬਣਿਆ ਹੈ, ਉਸ ਨੂੰ ਬਹੁਤ ਪਰੇਸ਼ਾਨ ਕਰ ਰਿਹਾ ਸੀ।
ਜਦੋਂ ਉਸ ਨੂੰ ਟਾਈਫਾਇਡ ਬੁਖਾਰ ਹੋਇਆ ਤਾਂ ਉਸ ਨੇ ਮੈਡੀਕਲ ਛੁੱਟੀ ਲਈ ਸੀ। ਉਸ ਸਮੇਂ ਵੀ ਉਸ ਤੋਂ 5 ਹਜ਼ਾਰ ਰੁਪਏ ਰਿਸ਼ਵਤ ਲਈ ਗਈ। ਮ੍ਰਿਤਕ ਦੀ ਪਛਾਣ ਤਰਸੇਮ ਸਿੰਘ ਵਜੋਂ ਹੋਈ ਹੈ, ਜੋ ਗੁਰੂ ਅਰਜਨ ਦੇਵ ਸਰਕਾਰੀ ਕਾਲਜ ਦੀ ਲਾਇਬ੍ਰੇਰੀ ਵਿੱਚ ਲਗਭਗ 26 ਸਾਲਾਂ ਤੋਂ ਕੰਮ ਕਰ ਰਹੇ ਸਨ। ਪੁਲਿਸ ਫਿਲਹਾਲ ਇਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ।
ਤਰਸੇਮ ਸਿੰਘ ਨੇ ਵੀਡੀਓ ਵਿੱਚ ਕਿਹਾ, “ਹੈਲੋ ਜੀ, ਮੇਰਾ ਨਾਮ ਤਰਸੇਮ ਸਿੰਘ ਹੈ। ਮੈਂ ਸ੍ਰੀ ਗੁਰੂ ਅਰਜੁਨ ਦੇਵ ਸਰਕਾਰੀ ਕਾਲਜ ਤਰਨਤਾਰਨ ਵਿੱਚ ਲਾਇਬ੍ਰੇਰੀ ਅਟੈਂਡੈਂਟ ਦੀ ਡਿਊਟੀ ਕਰ ਰਿਹਾ ਹਾਂ। ਅੱਜ ਤੱਕ ਮੇਰੇ ਕਿਸੇ ਵੀ ਕੰਮ ਨੂੰ ਲੈ ਕੇ ਕੋਈ ਸ਼ਿਕਾਇਤ ਨਹੀਂ ਆਈ। ਮੈਂ ਹਮੇਸ਼ਾ ਪੂਰੀ ਇਮਾਨਦਾਰੀ ਨਾਲ ਡਿਊਟੀ ਕੀਤੀ ਹੈ ਪਰ ਪਿਛਲੇ ਇੱਕ ਸਾਲ ਤੋਂ ਜਗਤਾਰ ਸਿੰਘ ਕਲਰਕ, ਜੋ ਪਿਛਲੇ ਮਹੀਨੇ ਸੁਪਰਿੰਟੈਂਡੈਂਟ ਬਣਿਆ ਹੈ, ਉਸ ਨੇ ਮੈਨੂੰ ਬਹੁਤ ਪਰੇਸ਼ਾਨ ਕੀਤਾ ਹੈ।
ਜਦੋਂ ਮੈਨੂੰ ਟਾਈਫਾਈਡ ਬੁਖਾਰ ਹੋਇਆ ਸੀ ਤਾਂ ਮੈਂ ਮੈਡੀਕਲ ਛੁੱਟੀ ਲਈ ਸੀ। ਉਸ ਸਮੇਂ ਉਸਨੇ ਮੇਰੇ ਕੋਲੋਂ 5,000 ਰੁਪਏ ਦੀ ਰਿਸ਼ਵਤ ਲਈ ਸੀ। ਬਾਅਦ ਵਿੱਚ ਮੈਨੂੰ ਇੱਕ ਲੋਨ (ਕਰਜ਼ਾ) ਦੀ ਪ੍ਰਕਿਰਿਆ ਕਰਨ ਦੀ ਲੋੜ ਸੀ, ਜਿਸ ਲਈ ਇੱਕ ਖਾਸ ਦਸਤਾਵੇਜ਼ ਦੀ ਲੋੜ ਸੀ; ਉਸਨੇ ਉਸ ਲਈ ਵੀ 5,000 ਰੁਪਏ ਦੀ ਰਿਸ਼ਵਤ ਮੰਗੀ।
ਹਾਲ ਹੀ ਵਿੱਚ ਮੈਂ ਇੱਕ ਮਹੀਨੇ ਲਈ ਮੈਡੀਕਲ ਛੁੱਟੀ ‘ਤੇ ਸੀ। ਮੇਰੇ ਬੱਚੇ ਮੇਰੀ ਛੁੱਟੀ ਦੀ ਅਰਜ਼ੀ ਜਮ੍ਹਾਂ ਕਰਵਾਉਣ ਲਈ ਕਾਲਜ ਗਏ ਸਨ ਪਰ ਕਿਸੇ ਵੀ ਸਟਾਫ ਮੈਂਬਰ ਨੇ ਇਸਨੂੰ ਸਵੀਕਾਰ ਨਹੀਂ ਕੀਤਾ। ਮੇਰੀ ਵੱਡੀ ਧੀ, ਜੋ 17 ਸਾਲਾਂ ਦੀ ਹੈ, ਨੂੰ ਛੁੱਟੀ ਦੀ ਪ੍ਰਕਿਰਿਆ ਕੀਤੇ ਬਿਨਾਂ ਹੀ ਚਾਰ ਵਾਰ ਕਾਲਜ ਤੋਂ ਵਾਪਸ ਭੇਜ ਦਿੱਤਾ ਗਿਆ।
ਇਸ ਵਿਅਕਤੀ ਨੇ ਮੈਨੂੰ ਪਿਛਲੇ ਇੱਕ ਮਹੀਨੇ ਤੋਂ ਬਹੁਤ ਪਰੇਸ਼ਾਨ ਕੀਤਾ ਹੈ। 10 ਤਾਰੀਖ ਨੂੰ ਮੇਰੀਆਂ ਮਿੰਨਤਾਂ ਕਰਨ ਤੋਂ ਬਾਅਦ ਤਨਖਾਹ ਪਾਈ ਗਈ। ਹੁਣ ਫਿਰ ਮੇਰੇ ਤੋਂ 5 ਹਜ਼ਾਰ ਰੁਪਏ ਰਿਸ਼ਵਤ ਮੰਗ ਰਿਹਾ ਹੈ। ਉਹ ਕਹਿ ਰਿਹਾ ਹੈ ਕਿ ਪੈਸੇ ਦੇ, ਨਹੀਂ ਤਾਂ ਤੇਰੀ ਬਦਲੀ ਕਰਵਾ ਦਿਆਂਗਾ।
1 ਤਾਰੀਖ ਨੂੰ ਪ੍ਰਿੰਸੀਪਲ ਨੇ ਮੈਨੂੰ ਕਾਲਜ ਬੁਲਾਇਆ ਅਤੇ ਕਿਹਾ ਕਿ ਜਿਵੇਂ ਵੀ ਤੇਰੀ ਹਾਲਤ ਹੈ, ਇੱਕ ਵਾਰ ਆ ਕੇ ਮੈਨੂੰ ਮਿਲੋ। ਜਦੋਂ ਮੈਂ ਮਿਲਣ ਗਿਆ ਤਾਂ ਪ੍ਰਿੰਸੀਪਲ ਨੂੰ ਆਪਣੀ ਸਰੀਰਕ ਹਾਲਤ ਬਾਰੇ ਦੱਸਿਆ। ਉਨ੍ਹਾਂ ਨੇ ਬਹੁਤ ਪਿਆਰ ਨਾਲ ਮੈਨੂੰ ਕਿਹਾ ਕਿ ਜਗਤਾਰ ਸਿੰਘ ਕੋਲ ਜਾ ਕੇ ਛੁੱਟੀ ਲੈ ਲਓ ਅਤੇ ਉਸ ਨਾਲ ਗੱਲ ਕਰੋ।
1 ਤਾਰੀਖ ਦੀ ਸੀਸੀਟੀਵੀ ਚੈੱਕ ਕੀਤੀ ਜਾਵੇ ਤਾਂ ਉਸ ਵਿੱਚ ਦਿਖਾਈ ਦੇਵੇਗਾ ਕਿ ਉਸ ਸਮੇਂ ਮੇਰੇ ਨਾਲ ਕਿਸ ਤਰ੍ਹਾਂ ਦਾ ਵਿਵਹਾਰ ਕੀਤਾ ਗਿਆ। ਮੈਂ ਉਸ ਤੋਂ ਬਹੁਤ ਮਾਫ਼ੀ ਮੰਗੀ ਅਤੇ ਹੱਥ ਵੀ ਜੋੜੇ, ਪਰ ਇਸ ਵਿਅਕਤੀ ‘ਤੇ ਸੁਪਰਿੰਟੈਂਡੈਂਸੀ ਦਾ ਹੰਕਾਰ ਚੜ੍ਹਿਆ ਹੋਇਆ ਹੈ। ਉਸ ਨੇ ਕਿਹਾ ਕਿ ਜਾਓ, ਜਾ ਕੇ ਆਪਣੀ ਡਿਊਟੀ ਦਾ ਕਿਤੇ ਹੋਰ ਪਤਾ ਕਰੋ ਅਤੇ ਕੋਈ ਦੂਜਾ ਕਾਲਜ ਦੇਖੋ। ਮੈਂ ਤੇਰੀ ਬਦਲੀ ਕਰਵਾ ਕੇ ਰਹਾਂਗਾ।
ਤਰਸੇਮ ਸਿੰਘ ਦੀ ਪਤਨੀ ਨੀਤੂ ਨੇ ਕਿਹਾ, “ਮੇਰੇ ਪਤੀ ਆਪਣੀ ਨੌਕਰੀ ਵਧੀਆ ਢੰਗ ਨਾਲ ਕਰ ਰਹੇ ਸਨ। ਇੱਥੇ, ਜਗਤਾਰ ਸਿੰਘ ਉਨ੍ਹਾਂ ਨੂੰ ਧਮਕੀਆਂ ਦਿੰਦਾ ਸੀ। ਜਦੋਂ ਵੀ ਕੋਈ ਕੰਮ ਕਰਵਾਉਣਾ ਹੁੰਦਾ ਸੀ, ਜਗਤਾਰ 5,000 ਰੁਪਏ ਦੀ ਮੰਗ ਕਰਦਾ ਸੀ। ਜੇਕਰ ਮੇਰੇ ਪਤੀ ਉਹ ਰਕਮ ਨਾ ਦਿੰਦੇ ਤਾਂ ਉਨ੍ਹਾਂ ਨੂੰ ਧਮਕੀਆਂ ਦਾ ਸਾਹਮਣਾ ਕਰਨਾ ਪੈਂਦਾ ਸੀ।
ਉਹ ਕਹਿੰਦਾ ਸੀ ਕਿ ਉਹ ਉਨ੍ਹਾਂ ਦੀ ਬਦਲੀ ਕਰਵਾ ਦੇਵੇਗਾ। ਉਹ ਉਨ੍ਹਾਂ ਦੀ ਤਨਖ਼ਾਹ ਜਾਰੀ ਨਹੀਂ ਕਰਦਾ ਸੀ। ਜਦੋਂ ਬਾਕੀਆਂ ਦੇ ਬਿੱਲ ਪਾਸ ਹੋ ਜਾਂਦੇ ਸਨ, ਤਾਂ ਉਹ ਮੇਰੇ ਪਤੀ ਦੇ ਬਿੱਲ ਪਾਸ ਨਹੀਂ ਸੀ ਕਰਦਾ। ਉਹ ਉਨ੍ਹਾਂ ਤੋਂ ਵਾਰ-ਵਾਰ ਕਾਗਜ਼ੀ ਕਾਰਵਾਈ ਦੁਬਾਰਾ ਕਰਵਾਉਂਦਾ ਸੀ। ਹੁਣ, ਉਨ੍ਹਾਂ ਨੇ ਜਾਨ ਦੇ ਦਿੱਤੀ ਹੈ।”
EDITED BY- HARLEEN KAUR
