ਪੇਟ ਵਿੱਚ ਗੈਸ ਅਤੇ ਐਸਿਡਿਟੀ ਅੱਜਕੱਲ ਇੱਕ ਆਮ ਸਮੱਸਿਆ ਬਣ ਚੁੱਕੀ ਹੈ। ਗਲਤ ਖਾਣ-ਪੀਣ, ਵੱਧ ਮਸਾਲੇਦਾਰ ਜਾਂ ਤਲੇ-ਭੁੰਨੇ ਭੋਜਨ ਦੀ ਆਦਤ, ਲੋੜ ਤੋਂ ਜ਼ਿਆਦਾ ਖਾਣਾ ਅਤੇ ਤਣਾਅ ਇਸ ਦੀਆਂ ਵੱਡੀਆਂ ਵਜ੍ਹਾ ਮੰਨੀਆਂ ਜਾਂਦੀਆਂ ਹਨ।
ਜਦੋਂ ਪੇਟ ਦੀਆਂ ਗ੍ਰੰਥੀਆਂ ਲੋੜ ਤੋਂ ਵੱਧ ਐਸਿਡ ਬਣਾਉਣ ਲੱਗ ਪੈਂਦੀਆਂ ਹਨ, ਤਾਂ ਇਹ ਐਸਿਡ ਉੱਪਰ ਵੱਲ ਇਸੋਫੇਗਸ ਤੱਕ ਪਹੁੰਚ ਜਾਂਦਾ ਹੈ। ਇਸ ਹਾਲਤ ਨੂੰ ਐਸਿਡ ਰੀਫਲਕਸ ਕਿਹਾ ਜਾਂਦਾ ਹੈ, ਜਿਸ ਨਾਲ ਛਾਤੀ ਜਾਂ ਗਲੇ ਵਿੱਚ ਜਲਨ ਮਹਿਸੂਸ ਹੁੰਦੀ ਹੈ, ਜਿਸਨੂੰ ਆਮ ਭਾਸ਼ਾ ਵਿੱਚ ਹਾਰਟਬਰਨ ਕਿਹਾ ਜਾਂਦਾ ਹੈ। ਕਈ ਵਾਰ ਇਹ ਸਮੱਸਿਆ ਗੈਸਟ੍ਰਾਈਟਿਸ ਜਾਂ ਪੇਟ ਵਿੱਚ ਐਸਿਡ ਦੇ ਅਸੰਤੁਲਨ ਕਾਰਨ ਵੀ ਹੋ ਸਕਦੀ ਹੈ।
ਹਲਕੀ ਐਸਿਡਿਟੀ ਵਿੱਚ ਘਰੇਲੂ ਉਪਾਅ ਕਾਫ਼ੀ ਰਾਹਤ ਦੇ ਸਕਦੇ ਹਨ, ਪਰ ਜੇ ਸਮੱਸਿਆ ਲੰਮੇ ਸਮੇਂ ਤੱਕ ਬਣੀ ਰਹੇ ਜਾਂ ਬਹੁਤ ਗੰਭੀਰ ਹੋ ਜਾਵੇ, ਤਾਂ ਡਾਕਟਰ ਦੀ ਸਲਾਹ ਲੈਣਾ ਜ਼ਰੂਰੀ ਹੁੰਦਾ ਹੈ। ਆਓ ਤੁਹਾਨੂੰ ਦੱਸਦੇ ਹਾਂ ਕਿ ਕਿਹੜੇ ਘਰੇਲੂ ਨੁਸਖਿਆਂ ਨਾਲ ਇਸ ਸਮੱਸਿਆ ਤੋਂ ਰਾਹਤ ਮਿਲ ਸਕਦੀ ਹੈ।
ਸੌਂਫ
ਸੌਂਫ ਦੇ ਬੀਜਾਂ ਵਿੱਚ ਐਨੇਥੋਲ ਨਾਮਕ ਤੱਤ ਹੁੰਦਾ ਹੈ, ਜੋ ਪਾਚਣ ਨੂੰ ਬਿਹਤਰ ਬਣਾਉਂਦਾ ਹੈ ਅਤੇ ਐਸਿਡਿਟੀ ਘਟਾਉਣ ਵਿੱਚ ਮਦਦਗਾਰ ਹੈ। ਇਹ ਗੈਸ ਅਤੇ ਪੇਟ ਫੁੱਲਣ ਦੀ ਸਮੱਸਿਆ ਨੂੰ ਵੀ ਘਟਾਉਂਦਾ ਹੈ। ਖਾਣੇ ਤੋਂ ਬਾਅਦ ਸੌਂਫ ਚਬਾਉਣਾ ਜਾਂ ਸੌਂਫ ਦੀ ਚਾਹ ਪੀਣਾ ਫਾਇਦੇਮੰਦ ਮੰਨਿਆ ਜਾਂਦਾ ਹੈ।
ਲੱਸੀ
ਲੱਸੀ ਨੂੰ ਐਸਿਡਿਟੀ ਲਈ ਇੱਕ ਆਸਾਨ ਅਤੇ ਅਸਰਦਾਰ ਘਰੇਲੂ ਨੁਸਖਾ ਮੰਨਿਆ ਜਾਂਦਾ ਹੈ। ਇਸ ਵਿੱਚ ਮੌਜੂਦ ਲੈਕਟਿਕ ਐਸਿਡ ਪਾਚਣ ਨੂੰ ਬਿਹਤਰ ਬਣਾਉਂਦਾ ਹੈ ਅਤੇ ਪੇਟ ਦੇ ਐਸਿਡ ਨੂੰ ਸੰਤੁਲਿਤ ਕਰਦਾ ਹੈ। ਹਲਕੇ ਮਸਾਲਿਆਂ ਨਾਲ ਲਈ ਗਈ ਲੱਸੀ ਐਸਿਡ ਰੀਫਲਕਸ ਤੋਂ ਤੁਰੰਤ ਰਾਹਤ ਦੇ ਸਕਦੀ ਹੈ।
ਅਦਰਕ
ਅਦਰਕ ਨੂੰ ਸਦੀਆਂ ਤੋਂ ਗੈਸ ਅਤੇ ਐਸਿਡਿਟੀ ਦੇ ਘਰੇਲੂ ਇਲਾਜ ਵਜੋਂ ਵਰਤਿਆ ਜਾਂਦਾ ਆ ਰਿਹਾ ਹੈ। ਇਹ ਅੰਤੜੀਆਂ ਵਿੱਚ ਬਣਨ ਵਾਲੀ ਗੈਸ ਨੂੰ ਘਟਾਉਂਦਾ ਹੈ, ਪੇਟ ਦੀ ਅੰਦਰੂਨੀ ਪਰਤ ਨੂੰ ਸ਼ਾਂਤ ਕਰਦਾ ਹੈ ਅਤੇ ਐਸਿਡ ਦੇ ਉਤਪਾਦਨ ਨੂੰ ਕਾਬੂ ਵਿੱਚ ਰੱਖਣ ਵਿੱਚ ਮਦਦ ਕਰਦਾ ਹੈ। ਅਦਰਕ ਵਿੱਚ ਮੌਜੂਦ ਜਿੰਜਰੋਲ ਨਾਮਕ ਤੱਤ ਪਾਚਣ ਨੂੰ ਬਿਹਤਰ ਬਣਾਉਂਦਾ ਹੈ ਅਤੇ ਸੋਜ ਘਟਾਉਂਦਾ ਹੈ, ਜਿਸ ਨਾਲ ਐਸਿਡਿਟੀ ਕਾਰਨ ਹੋਣ ਵਾਲੀ ਜਲਨ ਤੋਂ ਰਾਹਤ ਮਿਲਦੀ ਹੈ।
ਤੁਲਸੀ ਦੇ ਪੱਤੇ
ਤੁਲਸੀ ਦੇ ਪੱਤੇ ਪੇਟ ਨਾਲ ਸੰਬੰਧਤ ਸਮੱਸਿਆਵਾਂ ਲਈ ਕਾਫ਼ੀ ਫਾਇਦੇਮੰਦ ਮੰਨੇ ਜਾਂਦੇ ਹਨ। ਇਨ੍ਹਾਂ ਵਿੱਚ ਯੂਜੀਨੋਲ ਅਤੇ ਕਾਰਮਿਨੇਟਿਵ ਗੁਣ ਹੁੰਦੇ ਹਨ, ਜੋ ਸੋਜ ਨੂੰ ਘਟਾਉਂਦੇ ਹਨ ਅਤੇ ਪਾਚਣ ਨੂੰ ਠੀਕ ਰੱਖਦੇ ਹਨ। ਤੁਲਸੀ ਪੇਟ ਦੀ ਪਰਤ ਨੂੰ ਸ਼ਾਂਤ ਕਰਦੀ ਹੈ, ਐਸਿਡ ਰੀਫਲਕਸ ਘਟਾਉਂਦੀ ਹੈ ਅਤੇ ਹਾਰਟਬਰਨ ਵਰਗੀ ਪਰੇਸ਼ਾਨੀ ਵਿੱਚ ਰਾਹਤ ਦਿੰਦੀ ਹੈ।
ਐਲੋਵੇਰਾ ਜੂਸ
ਐਲੋਵੇਰਾ ਪੇਟ ਲਈ ਠੰਢਕ ਪੈਦਾ ਕਰਨ ਵਾਲਾ ਮੰਨਿਆ ਜਾਂਦਾ ਹੈ। ਇਹ ਪੇਟ ਅਤੇ ਭੋਜਨ ਨਲੀ ਵਿੱਚ ਹੋਣ ਵਾਲੀ ਜਲਨ ਨੂੰ ਘਟਾਉਂਦਾ ਹੈ ਅਤੇ ਐਸਿਡ ਨੂੰ ਕਾਬੂ ਵਿੱਚ ਰੱਖਣ ਵਿੱਚ ਮਦਦ ਕਰਦਾ ਹੈ। ਐਲੋਵੇਰਾ ਪੇਟ ਦੀ ਅੰਦਰੂਨੀ ਪਰਤ ਨੂੰ ਠੀਕ ਕਰਨ ਵਿੱਚ ਸਹਾਇਕ ਹੁੰਦਾ ਹੈ। ਖਾਣੇ ਤੋਂ ਪਹਿਲਾਂ ਥੋੜ੍ਹਾ ਜਿਹਾ ਐਲੋਵੇਰਾ ਜੂਸ ਲੈਣ ਨਾਲ ਪਾਚਣ ਤੰਤਰ ਨੂੰ ਆਰਾਮ ਮਿਲਦਾ ਹੈ।
EDITED BY- HARLEEN KAUR
