ਸਰਦੀਆਂ ਦੇ ਆਉਣ ਦੇ ਨਾਲ ਹੀ ਖਾਣ-ਪੀਣ ਦੀਆਂ ਆਦਤਾਂ ਵਿੱਚ ਬਦਲਾਅ ਜ਼ਰੂਰੀ ਹੋ ਜਾਂਦੇ ਹਨ। ਸਰੀਰ ਨੂੰ ਗਰਮ ਰੱਖਣ ਅਤੇ ਬਿਮਾਰੀ ਤੋਂ ਬਚਾਉਣ ਲਈ ਰਸੋਈ ਵਿੱਚ ਮੌਜੂਦ ਚੀਜ਼ਾਂ ਨੂੰ ਦਵਾਈ ਦੇ ਤੌਰ ‘ਤੇ ਵਰਤਿਆ ਜਾ ਸਕਦਾ ਹੈ। ਲਸਣ ਨਾ ਸਿਰਫ਼ ਇੱਕ ਮਸਾਲਾ ਹੈ ਜਿਸ ਨਾਲ ਖਾਣੇ ਦਾ ਸੁਆਦ ਵਧਦਾ ਹੈ, ਸਗੋਂ ਸਰਦੀਆਂ ਦੌਰਾਨ ਸਰੀਰ ਲਈ ਇੱਕ ਵਰਦਾਨ ਵੀ ਹੈ।
ਜੇਕਰ ਸਹੀ ਢੰਗ ਨਾਲ ਸੇਵਨ ਕੀਤਾ ਜਾਵੇ, ਤਾਂ ਲਸਣ ਦਿਲ ਦੀ ਸਿਹਤ ਲਈ ਬਹੁਤ ਫਾਇਦੇਮੰਦ ਹੁੰਦਾ ਹੈ। ਇਹ ਖੂਨ ਵਿੱਚ ਮਾੜੇ ਕੋਲੈਸਟ੍ਰੋਲ ਨੂੰ ਘਟਾਉਣ ਵਿੱਚ ਮਦਦ ਕਰਦਾ ਹੈ, ਜਿਸ ਨਾਲ ਬਲੱਡ ਪ੍ਰੈਸ਼ਰ ਨੂੰ ਕੰਟਰੋਲ ਕੀਤਾ ਜਾਂਦਾ ਹੈ ਅਤੇ ਦਿਲ ਦੀ ਬਿਮਾਰੀ ਦਾ ਖ਼ਤਰਾ ਘੱਟ ਜਾਂਦਾ ਹੈ। ਇਸ ਤੋਂ ਇਲਾਵਾ, ਲੋਕ ਅਕਸਰ ਸਰਦੀਆਂ ਦੌਰਾਨ ਜੋੜਾਂ ਵਿੱਚ ਦਰਦ ਅਤੇ ਜਕੜਨ ਦੀ ਸ਼ਿਕਾਇਤ ਕਰਦੇ ਹਨ। ਲਸਣ ਦਾ ਸੇਵਨ ਕਰਨ ਨਾਲ ਇਨ੍ਹਾਂ ਸਮੱਸਿਆਵਾਂ ਤੋਂ ਵੀ ਰਾਹਤ ਮਿਲਦੀ ਹੈ।
ਸਰਦੀਆਂ ਦੌਰਾਨ ਇਮਿਊਨਿਟੀ ਕਮਜ਼ੋਰ ਹੋਣ ਲੱਗ ਜਾਂਦੀ ਹੈ, ਜਿਸ ਨਾਲ ਜ਼ੁਕਾਮ ਹੋਣ ਦੀ ਸੰਭਾਵਨਾ ਵੱਧ ਜਾਂਦੀ ਹੈ। ਲਸਣ ਸਰੀਰ ਦੀ ਗਰਮੀ ਬਣਾਈ ਰੱਖਣ ਵਿੱਚ ਮਦਦ ਕਰਦਾ ਹੈ ਅਤੇ ਇਮਿਊਨਿਟੀ ਨੂੰ ਵਧਾਉਂਦਾ ਹੈ। ਇਹ ਜ਼ਹਿਰੀਲੇ ਪਦਾਰਥਾਂ ਨੂੰ ਬਾਹਰ ਕੱਢਣ ਅਤੇ ਖੂਨ ਸੰਚਾਰ ਨੂੰ ਬਿਹਤਰ ਬਣਾਉਣ ਵਿੱਚ ਵੀ ਮਦਦ ਕਰਦਾ ਹੈ। ਲਸਣ ਨੂੰ ਕਿਹੜੇ ਤਰੀਕੇ ਨਾ ਖਾਣਾ ਚਾਹੀਦਾ ਆਓ ਜਾਣਦੇ ਹਾਂ-
ਰਾਤ ਭਰ ਭਿਓਂ ਕੇ ਰੱਖੋ: ਲਸਣ ਦੀਆਂ 1-2 ਤੁਰੀਆਂ ਛਿੱਲ ਕੇ ਰਾਤ ਭਰ ਪਾਣੀ ਵਿੱਚ ਭਿਓਂ ਦਿਓ। ਇਸ ਪਾਣੀ ਨੂੰ ਸਵੇਰੇ ਖਾਲੀ ਪੇਟ ਪੀਓ ਜਾਂ ਲਸਣ ਦੀਆਂ ਤੁਰੀਆਂ ਨੂੰ ਚਬਾਓ। ਇਹ ਤਰੀਕਾ ਕੋਲੈਸਟ੍ਰੋਲ ਅਤੇ ਬਲੱਡ ਪ੍ਰੈਸ਼ਰ ਨੂੰ ਕੰਟਰੋਲ ਕਰਨ ਲਈ ਸਭ ਤੋਂ ਪ੍ਰਭਾਵਸ਼ਾਲੀ ਹੈ।
ਕੋਸੇ ਪਾਣੀ ਨਾਲ: ਤੁਸੀਂ ਸਵੇਰੇ ਖਾਲੀ ਪੇਟ ਕੋਸੇ ਪਾਣੀ ਦੇ ਨਾਲ 1-2 ਕੱਚੇ ਲਸਣ ਦੀਆਂ ਤੁਰੀਆਂ ਵੀ ਲੈ ਸਕਦੇ ਹੋ।
ਦਰਦ ਲਈ ਲਸਣ ਦਾ ਤੇਲ:
ਲਗਭਗ 50 ਗ੍ਰਾਮ ਲਸਣ ਨੂੰ ਪੀਸ ਲਓ।
ਇਸਨੂੰ 100 ਤੋਂ 200 ਗ੍ਰਾਮ ਸਰ੍ਹੋਂ, ਨਾਰੀਅਲ, ਜਾਂ ਜੈਤੂਨ ਦੇ ਤੇਲ ਵਿੱਚ ਪਕਾਓ।
ਜਦੋਂ ਲਸਣ ਕਾਲਾ ਹੋ ਜਾਵੇ, ਤਾਂ ਤੇਲ ਨੂੰ ਛਾਣ ਕੇ ਸਟੋਰ ਕਰੋ। ਇਸ ਤੇਲ ਨਾਲ ਦਰਦ ਵਾਲੀ ਥਾਂ ਦੀ ਮਾਲਿਸ਼ ਕਰਨ ਨਾਲ ਕਾਫ਼ੀ ਰਾਹਤ ਮਿਲਦੀ ਹੈ। ਇਹ ਦਿਮਾਗੀ ਪ੍ਰਣਾਲੀ ਨੂੰ ਵੀ ਮਜ਼ਬੂਤ ਬਣਾਉਂਦਾ ਹੈ ਅਤੇ ਵਾਤ ਦੋਸ਼ ਨੂੰ ਸ਼ਾਂਤ ਕਰਦਾ ਹੈ।
EDITED BY- HARLEEN KAUR
